يراننىڭ ءسىم وكىلى اقش سانكتسياسىن سىنعا الدى. فوتو: IRNA.

يران سىرتقى ىستەر مينيسترىلىگىنىڭ رەسمي وكىلى باحرام عاسەمي اقش-تىڭ يرانعا قاراتقان سانكتسياسى تۋرالى پىكىر ءبىلدىرىپ، بۇل شارانىڭ ەشقانداي پايداسىز جانە ناتيجەسىز ەكەنىن ايتقان. بۇل تۋرالى IRNA اقپاراتتىق اگەنتتىگى حابارلادى. 

باحرام عاسەميدىڭ ايتۋىنشا اقش سانكتسياسى يراننىڭ ەكونوميكالىق قۇرىلىمىنا ايتارلىقتاي ۇلكەن اسەر ەتە قويمايدى. بۇعان يراننىڭ وڭىردەگى ماڭىزدى ستراتەگيالىق ورىنى مەن ىقپالى سەبەپ بولاتىنىن العا تارتقان. ول سوزىندە: «يران ايماقتاعى سالماعى بار ەلدەردىڭ ءبىرى جانە قازىرگى كەزدە جاھاندىق قولداۋعا يە. الەم ەلدەرىنىڭ كومپانيالارى اقش-تىڭ قوقان-لوقىسىنا قاراماستان يرانمەن ىنتىماقتاستىق ورناتۋعا ىنتالى»، – دەدى.

يران لاۋازىمدىلارىنىڭ ايتۋىنشا بۇل تەكەتىرەستەگى جەڭىلۋشى اقش پرەزيدەنتى بولماق ەكەن. الايدا، قازىرگى كەزدە يراننىڭ ىشكى الەۋمەتتىك تولقۋى بارعان سايىن كۇشەيىپ كەلەدى. ۇكىمەت لاۋازىمدىلارى كەزەگىمەن مالىمدەمە جاساپ، «يران حالقىن كەزەكتى قيىنشىلىقتان دا تىنىشتىقپەن وتۋگە» شاقىرۋدا.

“The Qazaq Times”