قىرعىزستاننىڭ بۇرىنعى پرەمەر-ءمينيسترى ساپار يساكوۆ باس پروكۋراتۋرادان بوپسالاۋ فاكتىسىن تەكسەرۋىن سۇرادى.

بۇل تۋرالى قسدپ وكىلى كۋندۋز جولدۋباەۆا حابارلادى. ونىڭ ايتۋىنشا، يساكوۆتىڭ ارىزى قۇزىرلى ورگانعا 6 تامىزدا جولداندى:

- ساپار يساكوۆ ءوزىن ۇلتتىق قاۋىپسىزدىك مەملەكەتتىك كوميتەتىنىڭ قىزمەتكەرى قورقىتقانىن تەكسەرۋىن سۇرايدى. بىرنەشە اپتا بۇرىن ءوزىن يليم دەپ تانىستىرعان كوميتەت قىزمەتكەرى يساكوۆقا "ەگەر ادۆوكات نۇربەك توكتاكۋنوۆتان باس تارتپاساڭ، ساعان قارسى تاعى ءبىر ءىس قوزعايمىز" دەپ قورقىتقان، - دەدى ول.

بۇنىڭ الدىندا بۇرىنعى پرەمەر-ءمينيستردىڭ ادۆوكاتى توكتاكۋنوۆ ء"وزىنىڭ قورعاۋىنداعى ازاماتتى كوميتەت قىزمەتكەرى بوپسالاعانىن" مالىمدەگەن. كوميتەت بۇنى جوققا شىعارىپ وتىر.

ساپار يساكوۆ بيىل 5 ماۋسىمدا جەمقورلىق ايىبىمەن ۇستالدى.

“The Qazaq Times”