پومپەونىڭ ازيا ساپارىنداعى ماقساتى ۋادەسىنەن جالتارعان سولتۇستىك كورەيانى جونگە سالۋ

ازياعا رەسمي ساپارمەن اتتانعان اقش مەملەكەتتىك حاتشىسى مايك پومپەونىڭ العاشقى بەكەتى مالايزيا بولدى. ونىڭ بۇل ساپارىنىڭ باستى ماقساتى ەركىن ساۋدانى جەبەۋ جانە سولتۇستىك كورەيانى يادرولىق قارۋدان بارىنشا ەرتەرەك باس تارتۋعا كوندىرۋ. بۇل تۋرالى VOA باسىلىمى حابارلادى.

پومپەو بەيسەنبى كۇنى كۋالا-لۋمپۋرعا جەتتى، ال بۇگىن مالايزيانىڭ پرەمەر-مينيسترىمەن كەزدەسەدى. ساپارىنىڭ كۇن ءتارتىبى بويىنشا، مالايزيادان كەيىن ASEAN ايماقتىق فورۋمىنا قاتىسۋ ءۇشىن سينگاپۋرعا بارماق.

ماۋسىم ايىندا ترامپ-كيم سامميتىنەن كەيىن، قۇراما شتاتتىڭ لاۋازىمدىلارى سولتۇستىك كورەيا يادرولىق قارۋدان باس تارتادى دەپ ۇمىتتەنگەن. الايدا، قازىرگە دەيىن سولتۇستىك كورەيادا يادرولىق قارۋسىزدانۋ پروتسەسى بايقالمادى. كەزەكتى ازيا ساپارىندا پومپەو جۋرناليستەر سۇراعىنا جاۋاپ بەرىپ، اقش تارابى سولتۇستىك كورەيانىڭ ءوز ۋادەلەرىن ورىنداماي كەتۋىنەن الاڭداپ وتىرعانىن مويىندادى.

Washington Post باسىلىمىنىڭ سەيسەنبى كۇنگى حابارىندا دا، اقش ۇكىمەتىندە سولتۇستىك كورەيا ىسىنەن الاڭداۋشىلىقتىڭ كۇشتى ەكەنى جازىلادى. بارلاۋ ۇيىمدارىنىڭ وكىلدەرى بەرگەن مالىمەتكە سەنسەك، پيوڭياڭ (پحەنيان) جاڭا زىمىرانداردى دامىتۋدى جالعاستىرۋدا، ءتىپتى، قۇراما شتاتتىڭ شىعىس جاعالاۋداعى قالالارىن سوققىلاي الاتىن زىمىران قۇرىلعىلارىن ورناتىپ قويعان.

وسى اپتاداعى ساپارىندا پومپەو ASEAN ايماقتىق فورۋمىنا قاتىسۋشى ەلدەردى سولتۇستىك كورەياعا باعىتتالعان سانكتسيانى جالعاستى قاتاڭ ساقتاۋعا شاقىرماق. سونىمەن بىرگە، بۇل ساپارىندا اقش مەملەكەتتىك حاتشىسى ايماقتاعى ەلدەرمەن وڭتۇستىك قىتاي تەڭىزى ماسەلەسىن، ميانماداعى مۇسىلماندار داعدارىسى جانە كيبەر-قاۋىپسىزدىك ماسەلەلەرىن تالقىعا سالماق.

“The Qazaq Times”