گرۋزيا بيلىگى پرەزيدەنت سايلاۋىنىڭ ۋاقىتىن بەلگىلەدى – دەپ حابارلايدى «Sputnik گرۋزيا» اقپارات اگەنتتىگى.

گرۋزيانىڭ قازىرگى پرەزيدەنتى گەورگي مارگۆەلاشۆيلي الدا كەلە جاتقان پرەزيدەنت سايلاۋىنا بايلانىستى وتكەن ءباسپاسوز ءماسليحاتىندا: «گرۋزيا حالقى جاڭا پرەزيدەنتىن قازان ايىنىڭ 28-ءى كۇنى سايلايتىن بولادى. سەبەبى ءبىز پرەمەر-مينيسترمەن كەلىسە وتىرىپ پرەزيدەنت سايلاۋىن وسى كۇنگە قويدىق. سايلاۋعا قاتىستى قۇجاتتار الداعى ۋاقىتتا ۇكىمەت باسشىسى مەن پارلامەنتكە جولداناتىن بولادى» - دەپ مالىمدەگەن.

جەرگىلىكتى باق وكىلدەرىنىڭ مالىمەتىنشە، قازىردىڭ وزىندە پرەزيدەنت سايلاۋىنا قاتىسۋعا پارلامەنتتىڭ ەكس-سپيكەرى داۆيد ۋسۋپاشۆيلي، گرۋزيا ليبەرالدار پارتياسىنىڭ كوشباسشىسى شالۆا ناتەلاشۆيلي، «گيرچي» پارتياسىنىڭ وكىلى زۋراب دجاپاريدزە، «گرۋزيا مارشى» قوزعالىسىنىڭ مۇشەسى ساندرو برەگادزە، ەكس-سىرتقى ىستەر ءمينيسترى گريگول ۆاشادزە جانە وپپوزيتسيالىق «ەۋروپالىق گرۋزيا – بوستاندىق ءۇشىن كۇرەس قوزعالىسى» پارتياسىنىڭ وكىلى داۆيد داكرادزە نيەت بىلدىرگەن.

ايتا كەتەتىن ءبىر جايت، گرۋزياداعى بۇل جولعى پرەزيدەنت سايلاۋى بۇرىنعىلاردان وزگەرەك بولايىن دەپ تۇر. سەبەبى جاڭا زاڭ بويىنشا، گرۋزيا حالقى بۇدان بىلاي پرەزيدەنت سايلاۋىنا قاتىسپايدى. وسى سايلاۋدان كەيىنگى پرەزيدەنت سايلاۋلارىنىڭ بارلىعىندا مەملەكەت باسشىسىن پارلامەنت سايلايتىن بولادى.

“The Qazaq Times”