بۇۇ تاريحتا العاش رەت كوشى-قون تۋرالى جاھاندىق كەلىسىمشارتتىڭ ءماتىنىن ماقۇلدادى

بىرىككەن ۇلتتار ۇيىمى تاريحتا العاش رەت كوشى-قون تۋرالى كەلىسىمشارتتىڭ ءماتىنىن ماقۇلدادى. بۇل تۋرالى بۇۇ باس اسسامبلەياسىنىڭ توراعاسى ميروسلاۆ لايچاك مالىمدەگەن. ەندى، وسى اتالعان رەسمي قۇجات وسى جىلدىڭ سوڭىندا ماروككودا وتەتىن جەلتوقسان كونفەرەنتسياسىندا قابىلدانادى، - دەپ حابارلايدى lemonde.fr.

ديپلوماتتىڭ سوزىنشە، قۇجات ادام قۇقىقتارىن باقىلاۋ مەن مەملەكەتتىڭ ەگەمەندىگىن ساقتاۋدىڭ ارا-قاتىناسىندا ءتيىمدى ءارى ورتاق مامىلە تابۋعا كومەكتەسەدى. سونىمەن قاتار، اتالعان كەلىسىمشارت بوسقىنداردىڭ سانىن ازايتۋعا باعىتتالماعان، الايدا ۇيىمعا بوسقىندارعا قاتىستى كەلەڭسىزدىكتەردىڭ الدىن الۋدا مەملەكەتتەردىڭ ىنتىماقتاستىعى مەن بەلسەندىلىگىن ارتتىرۋ ءۇشىن مۇمكىندىك بەرەدى. نەگىزىنەن، بوسقىنداردىڭ قۇقىقتارىنا باعىتتالعان قۇجات ءماتىنى ءبىر جارىم جىل بويى تەكسەرىلگەن. لايچاكتىڭ ايتۋىنشا، وسى مەرزىم ىشىنە 2,1 مىڭ ادام قازا تاپقان، ولاردىڭ 400-ءى بالالار. وندا دا، وسى ستاتيستيكاعا ادام ساۋداسىمەن اينالىسۋشىلاردىڭ قولىنا تۇسكەن قىز-كەلىنشەكتەر ەنگىزىلمەگەن.

ماۋسىم ايىنىڭ سوڭىندا ەۋرووداق ەلدەرى كەزەكتى سامميت كەزىندە كوشى-قون داعدارىسىن رەتتەۋگە ارنالعان كەلىسىمشارتتى ماقۇلداعان ەدى. ەندى، ەو-عا مۇشە ەلدەر بوسقىنداردى ەرىكتى تۇردە قابىلداي الادى. الايدا، وداق مۇشەلەرىنىڭ اراسىندا ولاردى مىندەتتەپ ءبولۋ قاراستىرىلماعان.

 “The Qazaq Times”