فوتو: akorda.kz

قازاقستاننىڭ ۇلتتىق بانكى مەن وزبەكستاننىڭ ورتالىق بانكى بانك سالاسىنا قاتىستى ەكىجاقتى كەلىسىمگە قول قويدى. ۇلتتىق بانكتىڭ مالىمەتىنە قاراعاندا، اتالعان قۇجات قازاقستاندىق بانكتەر ءۇشىن وزبەكستاننىڭ بانك نارىعىنا شىعۋعا قۇقىقتىق نەگىز قالىپتاستىرادى.

وسى قۇجات نەگىزىندە تاراپتار ەكى مەملەكەتتىڭ بانك سالاسىنا قاتىستى وزگەرىستەر مەن جاڭالىقتارعا قاتىستى اقپاراتتارمەن الماساتىن بولادى. سونىمەن قاتار، ءنورماتيۆتى-قۇقىقتىق رەتتەۋلەر، باقىلاۋلار ءارى ۇلتتىق زاڭنامالارمەن رۇقسات ەتىلگەن دەڭگەيدە بانكتىك قاداعالاۋلار جاساسا الادى.

«قازاقستان بانكتەرى قاجەتتى تالاپتارعا جاۋاپ بەرگەن جاعدايدا، ولارعا وزبەكستان تەرريتورياسىندا ترانسشەكارالىق قۇرىلىمدار قۇرۋ مۇمكىندىگى بەرىلەدى. ول قانداي تالاپتار دەگەنگە كەلەر بولساق، بانكتىڭ 100 ملن ەۋرو كولەمىندە جارعىلىق كاپيتالى بولۋى كەرەك، سونىمەن قاتار، حالىقارالىق دەڭگەيدە ۇزاق مەرزىمدى نەسيە رەيتينگى بولۋى شارت", - دەگەن ۇلتتىق بانكتىڭ توراعاسى دانيار اكيشەۆتىڭ ايتۋىنشا، «Halyk bank» بۇعان دەيىن دە وزبەكستاندىق نارىققا قىزىعۋشىلىق تانىتقان. ول، وزگە دە بانكتەر كورشى ەلدە ەنشىلەس بانكتەر قۇرۋدى قالايدى دەگەن ۇمىتتە.

“The Qazaq Times”