فوتو: ريا نوۆوستي.

رەسەي مەن وزبەكستان «سۋففا» راديوتەلەسكوپىنىڭ قۇرىلىسىن قايتا جانداندىرماق.

ربك تەلەارناسىنىڭ حابارلاۋىنشا، ماسكەۋ قالاسىندا وتكەن ءباسپاسوز ءماسليحاتىندا رەسەي عىلىم اكادەمياسىنىڭ پرەزيدەنتى الەكساندر سەرگەەۆ: «رەسمي ماسكەۋ مەن تاشكەنت "سۋففا" راديوتەلەسكوپىنىڭ قۇرىلىسىن قايتا جانداندىرۋدى كوزدەپ وتىر. بۇل رەسەي حالىقارالىق عىلىم ورتالىعىنىڭ وزگە ەل اۋماعىندا باستاعالى وتىرعان العاشقى جوباسى. وزبەكستاننىڭ ەڭ بيىك نۇكتەسىندە ورنالاساتىن "سۋففا" راديوتەلەسكوپىنىڭ قۇرىلىسىن باستاۋ ارقىلى ءبىز جاڭا حالىقارالىق كەلىسىم نەگىزىندە جۇمىس ىستەيتىن بولامىز. اتالمىش نىساننىڭ قۇرىلىسى ۇلكەن ساياسي ماڭىزعا يە. ءبىز "سۋففا" راديوتەلەسكوپى ارقىلى تمد اۋماعىندا وسى ۋاقىتقا دەيىن جوعالتىپ العان عىلىمي كۇش-قۋاتىمىزدى قايتا قايتارىپ الۋعا مۇمكىندىك الامىز» - دەپ مالىمدەگەن.

تاشكەنت قالاسىنىڭ وڭتۇستىك-باتىسىنداعى زاامين ەلدى مەكەنىنەن 40 شاقىرىم جەردە ورنالاسقان "سۋففا" راديوتەلەسكوپ زارتتەۋ ورتالىعىنىڭ قۇرىلىسى 1985 جىلى باستالعان. ونىڭ ىرگە تاسى ەڭ العاش 1981 جىلى قالانعان. بىراق، كەڭەستەر وداعىنىڭ قۇلاۋى مەن قارجى تاپشىلىعى سالدارىنان زەرتتەۋ ورتالىعىنىڭ قۇرىلىسى ورتا جولدا توقتاتىلعان. قازىرگى تاڭدا "سۋففا" راديوتەلەسكوپىنىڭ قۇرىلىسى اياقتالماعان كۇيدە تۇر. 2014 جىلعى ەسەپ بويىنشا، تەلەسكوپ قۇرىلىسىن اياقتاۋعا 50 ميلليون دوللار قارجى قاجەت.

“The Qazaq Times”