قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ ءبىلىم جانە عىلىم ءمينيسترى ەرلان ساعاديەۆكە دۇرسە قويدى. ۇكىمەت باسشىسى الماتى اكىمى باۋىرجان بايبەك ەسەپ بەرىپ جاتقاندا، باسقا ىسپەن اينالىسىپ وتىرعان ءمينيستردىڭ قىلىعىنا اشۋلانىپ، وعان  ەسكەرتۋ جاسادى.

«ەرلان كەنجەعاليۇلى، اكىمنىڭ سۇراعىنا جاۋاپ بەرىڭىز؟ ءسىز ونىڭ نە ايتقانىنا مۇلدەم ءمان بەرىپ وتىرعان جوقسىز! بۇل ماسەلە قاشان شەشىلەدى؟ اكىمدەردىڭ نە ايتىپ جاتقانى سىزگە ماڭىزدى ەمەس پە؟ ول كىمگە ايتىپ وتىر؟» - دەدى، ساعىنتاەۆ.

ۇكىمەت باسشىسىنىڭ بۇل سۇراعىنا ءبىلىم جانە عىلىم ءمينيسترى ماردىمدى جاۋاپ بەرە المادى. ەرلان ساعاديەۆ الماتى اكىمى باۋىرجان بايبەك ەسەپ بەرىپ جاتقان كەزدە، 6-شى سىنىپ وقۋشىلارىنا ارنالعان پاندىك وقۋلىقتى وقىپ وتىرعانىن جاسىرمادى.

«مەن «دۇنيەجۇزى تاريحى» ءپانىن وقىپ وتىرعان ەدىم. باۋىرجان بايبەكتىڭ نە ايتىپ جاتقانىنا شىنى كەرەك ءمان بەرمەدىم. الماتى اكىمى كوتەرگەن ماسەلەنى جىل سوڭىنا دەيىن شەشەمىز» - دەپ، شاتىپ-بۇتىپ جاۋاپ بەردى ساعاديەۆ.

بۇگىنگى ۇكىمەت وتىرىسىندا الماتى اگلومەراتسياسى تالقىعا سالىنعان ەدى. قالا باسشىسى باۋىرجان بايبەك 2 جىلدان بەرى الماتىدا شاعىن اۋدانداردىڭ سەيسمولوگيالىق كارتاسى ازىرلەنىپ جاتقانىن ايتقان. الايدا ولار جوبانى جۇزەگە اسىرۋ ءۇشىن ءبىلىم جانە عىلىم مينيسترلىگىنىڭ رۇقساتىن كۇتىپ وتىر ەكەن.

“The Qazaq Times”