اقش ەندى قىتايمەن اراداعى شيەلەنىستى رەتتەۋگە كىرىستى

قىتاي ۇكىمەتىنىڭ رەسمي مالىمدەمەسىنە قاراعاندا، اقش مەملەكەتتىك حاتشىسى پومپەو بەيسەنبى كۇنى (14 ماۋسىمدا) قىتايعا رەسمي ساپارمەن بارماق. بۇل تۋرالى VOA اقپاراتتىق اگەنتتىگى حابارلاعان.

قىتاي سىرتقى ىستەر مينيسترلىگىنىڭ رەسمي مالىمەتىندە: «قىتاي ءسىم باسشىسى ۋاڭ ي مەن اقش مەملەكەتتىك حاتشىسى مايك پومپەو ەكىجاقتى قارىم-قاتىناستاردى دامىتۋ جانە ماڭىزدى حالىقارالىق، وڭىرلىك ماسەلەلەردەگى ورتاق مۇددەلەر تۋراسىندا كەڭەس وتكىزەدى»، – دەلىنگەن.

پومپەو سەيسەنبى كۇنى سينگاپۋردا جاساعان مالىمدەمەسىندە، سارسەنبى كۇنى سەۋل ساپارىندا، بەيسەنبى كۇنى بەيجىڭ ساپارىندا بولاتىنىن ايتقان. ءارى بۇل ساپارى كورەي تۇبەگىن قارۋسىزداندىرۋ ءىسىن جەدەلدەتۋ ماقساتىندا جاسالاتىنىن جەتكىزگەن.

پومپەو وسى اپتادا بىرقاتار ماڭىزدى كەزدەسۋلەر مەن ءىس-ساپاردا بولدى. سينگاپۋرداعى ترامپ-كيم سامميتىندە قۇراما شتات دەلەگاتسياسىنا جەتەكشىلىك ەتتى، سونداي-اق، ترامپ پەن كيم جوڭ ۋن اراسىنداعى كەڭەيتىلگەن كەلىسسوزگە قاتىستى. ال سامميتتەن كەيىن ول ايماقتاعى ەلدەرگە كەلىسسوز ناتيجەسىن جاريالادى.

بۇدان، اقش ۇكىمەتىنىڭ سولتۇستىك كورەيامەن وتكىزگەن ديپلوماتيالىق بايلانىستاردان كەيىن، قىتايمەن اراداعى بايلانىستاردى رەتتەۋگە كىرىسكەنى بايقالادى.

“The Qazaq Times”