ترامپ قول بەرگىش ادەتىن كيم جوڭ ۋنعا دا ىستەتتى. فوتو: APF

اقش پرەزيدەنتى مەن سولتۇستىك كورەيا باسشىسىنىڭ سينگاپۋرداعى العاشقى تاريحي كەزدەسۋىندە تەك قانا اۋدارماشىلاردى عانا الىپ قالىپ، 50 مينۋتقا جۋىق وڭاشا سويلەستى. سودان كەيىن عانا وزگە لاۋازىمدىلاردى قاتىستىرعان كەلىسسوزگە كەزەك بەردى. بۇل تۋرالى BBC, Fox News, CNN قاتارلى الەمدىك ىقپالدى اقپارات قۇرالدارى حابار تاراتتى.

كەلىسسوزگە اقش تارابىنان: مەملەكەتتىك حاتشى مايك پومپەو، اق ءۇيدىڭ اپپارات جەتەكشىسى جون كەللي قاتىستى.

سولتۇستىك كورەيا تارابىنان: كورەيانىڭ ەڭبەكشىلەر پارتياسى توراعاسىنىڭ ورىنباسارى، كيم يون چول، سىرتقى ىستەر ءمينيسترى لي يون حو جانە لي سۋ يون قاتىستى.

اقپارات قۇرالدارىنا، تىكەلەي ەفيرلەرگە قاتىسقان ساراپشىلاردىڭ كوبى، ترامپ پەن كيمنىڭ كەزدەسۋ كەزىندەگى جايبىراقات وتىرىپ سويلەسكەنىنە كوبىرەك ءمان بەرىستى. بۇعان دەيىن ترامپ پەن كيم اراسىنداعى كەزدەسۋدە كۇتپەگەن ىستەردىڭ بولۋىنان الاڭداۋشىلىق بىلدىرگەن. دەگەنمەن، جاسى مەن تاجىريبەسى جاعىنداعى ۇلكەن ايىرماشىلىقتارعا قاراماستان ترامپ پەن كيم جوڭ ۋننىڭ ۇقساس جاقتارىنىڭ دا كوپ ەكەنى ايتىلادى. ايتالىق، ەكەۋى دە ەركىن مىنەزدى،  ىشىندەگى ويىن سىرتقا شىعارا بەرمەيتىن ليدەرلەر.

كەلىسسوز تاقىرىبى

باستى تاقىرىپ سولتۇستىك كورەيانىڭ يادرولىق قارۋدان باس تارتۋ ماسەلەسى. بىراق، كيم جوڭ ۋن  تالاپتاردىڭ قانشاسىنا ماقۇل بولاتىنىن بولجاپ ايتۋ قيىن. بىراق، كيم اۋلەتىنىڭ داعدىسىن بۇزىپ، اقش پرەزيدەنتىمەن كەلىسسوزگە كەلۋىنىڭ ءوزى ۇلكەن ىلگەرىلەۋشىلىك. بۇل قادامدى جاساۋعا جەتەرلىك قىسىم دا جاسالدى.

كەلىسسوز ۇستەلىنە كيمنىڭ قانداي تالاپتارىن الا كەلگەنى دە انىق بولماي وتىر. بىراق، ەكونوميكالىق وركەندەۋگە كومەك كورسەتۋ تالابىن قوياتىنىن كوپ ەلدىڭ ساراپشىلارى ايتىپ وتىر.

كەلىسسوز ۇستەلىنە قاراي. فوتو: APF/BBC.

كەلىسسوز ۇستەلىنە دەيىن

سينگاپۋرعا ەكى ەلدىڭ باسشىسى جەكسەنبى كۇنى اراسىنا بىرنەشە ساعات سالىپ ۇشىپ جەتتى. الدىمەن جەتكەن كيم جوڭ ۋن سينگاپۋردىڭ پرەمەر-مينيسترىمەن دە كەزدەسىپ ۇلگىردى. ەكەۋى ەكى بولەك مەيمانحاناعا جايعاسىپ، كەلىسسوز وتەتىن ورىنعا ەكى ءتۇرلى سالتاناتپەن كەلدى. اسىرەسە سينگاپۋر كوشەسىندە كيم جوڭ ۋن وتىرعان كولىكتى قورشاپ قاز-قاتار بولىپ جۇگىرىپ جۇرگەن وققاعارلار جەرگىلىكتى تۇرعىندار مەن اقپارات كوزدەرىنىڭ نازارىن اۋداردى.

بۇل رەت سولتۇستىك كورەيا دەلەگاتسياسىنىڭ شىعىنىن سينگاپۋر تارابى كوتەردى. قوناق يەسى بۇل قاراجاتتى «الەمنىڭ تۇراقتىلىعى مەن ءوڭىردىڭ قاۋىپسىزدىگىنە قوسقان ازعانا ۇلەسىمىز» دەپ ءتۇسىندىردى.

ۇزاق جىلداردان بەرى اقش پەن سولتۇستىك كورەيا ءبىر-ءبىرىن قاس-دۇشپانى رەتىندە قاراپ كەلدى. ءتىپتى، سولتۇستىك كورەيادا اقش-قا قارسىلىقتى ناسيحاتتايتىن ارنايى باعدارلامالار، مۇراجاي ورىندارى بار. بۇل سولتۇستىك كورەيا ءۇشىن ءوزىنىڭ «اتا جاۋىمەن» كەلىسسوز ۇستەلىنە كەلۋى بولدى دەسە دە ارتىق ەمەس.

ەكى ەل باسشىسىنىڭ 50 مينۋتقا جۋىق وڭاشا سويلەسۋىنەن كەيىن، كەلىسسوز جابىق كۇيدە ءوتتى. الەم كوز تىككەن بۇل كەزدەسۋدىڭ بارىسى جانە ونداعى كەلىسسوز ناتيجەسى الدا دا قاداعالاۋدا بولماق.

“The Qazaq Times”