Tramp qol bergiş ädetin Kim Joñ Unğa da istetti. Foto: APF

AQŞ prezidenti men Soltüstik Koreya basşısınıñ Singapurdağı alğaşqı tarihi kezdesuinde tek qana audarmaşılardı ğana alıp qalıp, 50 minutqa juıq oñaşa söylesti. Sodan keyin ğana özge lauazımdılardı qatıstırğan kelissözge kezek berdi. Bwl turalı BBC, Fox News, CNN qatarlı älemdik ıqpaldı aqparat qwraldarı habar tarattı.

Kelissözge AQŞ tarabınan: memlekettik hatşı Mayk Pompeo, Aq üydiñ apparat jetekşisi Jon Kelli qatıstı.

Soltüstik Koreya tarabınan: Koreyanıñ Eñbekşiler partiyası törağasınıñ orınbasarı, Kim Ion Çol, sırtqı ister ministri Li Ion Ho jäne Li Su Ion qatıstı.

Aqparat qwraldarına, tikeley efirlerge qatısqan sarapşılardıñ köbi, Tramp pen Kimniñ kezdesu kezindegi jaybıraqat otırıp söyleskenine köbirek män beristi. Bwğan deyin Tramp pen Kim arasındağı kezdesude kütpegen isterdiñ boluınan alañdauşılıq bildirgen. Degenmen, jası men täjiribesi jağındağı ülken ayırmaşılıqtarğa qaramastan Tramp pen Kim Joñ Unnıñ wqsas jaqtarınıñ da köp ekeni aytıladı. Aytalıq, ekeui de erkin minezdi,  işindegi oyın sırtqa şığara bermeytin liderler.

Kelissöz taqırıbı

Bastı taqırıp Soltüstik Koreyanıñ yadrolıq qarudan bas tartu mäselesi. Biraq, Kim Joñ Un  talaptardıñ qanşasına maqwl bolatının boljap aytu qiın. Biraq, Kim äuletiniñ dağdısın bwzıp, AQŞ prezidentimen kelissözge keluiniñ özi ülken ilgerileuşilik. Bwl qadamdı jasauğa jeterlik qısım da jasaldı.

Kelissöz üsteline Kimniñ qanday talaptarın ala kelgeni de anıq bolmay otır. Biraq, ekonomikalıq örkendeuge kömek körsetu talabın qoyatının köp eldiñ sarapşıları aytıp otır.

Kelissöz üsteline qaray. Foto: APF/BBC.

Kelissöz üsteline deyin

Singapurğa eki eldiñ basşısı jeksenbi küni arasına birneşe sağat salıp wşıp jetti. Aldımen jetken Kim Joñ Un Singapurdıñ prem'er-ministrimen de kezdesip ülgirdi. Ekeui eki bölek meymanhanağa jayğasıp, kelissöz ötetin orınğa eki türli saltanatpen keldi. Äsirese Singapur köşesinde Kim Joñ Un otırğan kölikti qorşap qaz-qatar bolıp jügirip jürgen oqqağarlar jergilikti twrğındar men aqparat közderiniñ nazarın audardı.

Bwl ret Soltüstik Koreya delegaciyasınıñ şığının Singapur tarabı köterdi. Qonaq iesi bwl qarajattı «älemniñ twraqtılığı men öñirdiñ qauipsizdigine qosqan azğana ülesimiz» dep tüsindirdi.

Wzaq jıldardan beri AQŞ pen Soltüstik Koreya bir-birin qas-dwşpanı retinde qarap keldi. Tipti, Soltüstik Koreyada AQŞ-qa qarsılıqtı nasihattaytın arnayı bağdarlamalar, mwrajay orındarı bar. Bwl Soltüstik Koreya üşin öziniñ «ata jauımen» kelissöz üsteline kelui boldı dese de artıq emes.

Eki el basşısınıñ 50 minutqa juıq oñaşa söylesuinen keyin, kelissöz jabıq küyde ötti. Älem köz tikken bwl kezdesudiñ barısı jäne ondağı kelissöz nätijesi alda da qadağalauda bolmaq.

“The Qazaq Times”