ترامپ پەن كيم جوڭ ۋن كەزدەستى. فوتو: VOA.

بۇگىن، 12 ماۋسىم سەيسەنبى، سينگاپۋردا اقش پرەزيدەنتى دونالد ترامپ پەن سولتۇستىك كورەيانىڭ ەڭ جوعارى باسشىسى كيم جوڭ ۋن تاريحي كەزدەسۋ وتكىزدى.

ترامپ پەن كيم جوڭ ۋن سەنتوزا شاعىن ارالىنداعى Capella قوناق ءۇيىنىڭ زالىندا كەزدەسكەننەن كەيىن، ءبىر-ءبىرىن كەلىسسوز زالىنا قاراي باستادى. جىلى سوزدەرمەن باستالعان العاشقى بىرەر اۋىز ديالوگتان كەيىن، ەكى ەل لاۋازىمدىلارى باق وكىلدەرىن شىعارىپ جىبەرىپ، كەلىسسوزدىڭ نەگىزگى بولەگىنە كىرىسكەن.

كەلىسسوز ناتيجەسى تۋرالى قازىرگە دەيىن تولىق مالىمەت تاراتىلعان جوق. دەگەنمەن، اقش سولتۇستىك كورەيادان يادرولىق قارۋدان «تولىق، قاداعالاۋلى جانە قايتالانبايتىن» شارتتار نەگىزىندە باس تارتۋدى تالاپ ەتكەن. ونىڭ ەسەسىنە سولتۇستىك كورەيانىڭ ەكونوميكالىق وركەندەۋىنە، بەيبىت ءھام جارقىن بولاشاققا قاراي دامۋىنا كومەك كورسەتۋگە ۋادە ەتكەن.

سولتۇستىك كورەيا وسىعان دەيىن دە، يادرولىق قارۋدان باس تارتاتىنىن مالىمدەگەن. تەك قاۋىپسىزدىگى مەن تۇراقتىلىعىنا اقش-تىڭ كەپىلدىك بەرۋى قاجەت ەكەنىن ايتىپ كەلگەن.

تاراپتار كەزەكتى سامميتتە وسى ماسەلەلەردى تالقىلاماق.

“The Qazaq Times”