اقش اسكەري شەندىسى: قۇراما شتات قىتايدىڭ جاساندى ارالدارىنىڭ كوزىن جويا الادى

پەنتاگون تاعىدا مالىمدەمە جاساپ، قىتايدىڭ وڭتۇستىك قىتاي تەڭىزىندەگى جاساندى ارالداردا جۇرگىزىپ جاتقان ميليتاريزاتسياسى قۇراما شتاتتاردى قورقىتا المايتىنىن ەسكەرتتى.  ءارى، قاقتىعىس قاۋپى ارتا تۇسسە دە اقش تارابى ناۆيگاتسيا بوستاندىعىن قورعاۋدى جالعاستىرا تۇسەتىنىن مالىمدەدى. بۇل تۋرالى The Wall Street Journal باسىلىمى حابارلادى.

اقش-تىڭ بىرىككەن شتاب باستىعى جانە تەڭىز كورپۋسىنىڭ باسشىسى، گەنەرال-لەيتەنانت كەننەت ماككەنزي اقش-تا قىتايدىڭ جاساندى ارالدارىن جويۋ مۇمكىندىگى بارما دەگەن سۇراققا: «مەنىڭ جاي عانا ايتقىم كەلەتىنى – قۇراما شتاتتاردىڭ تىنىق مۇحيتىنىڭ باتىس جاعالاۋىنداعى جاساندى ارالداردى جويۋعا باي تاجىريبەسى بار»، – دەدى. ول جانە: «ءبىزدىڭ ەكىنشى دۇنيە سوعىسىنان قالعان وقشاۋلانعان ارالداردى جويۋدا تاجىريبەمىز جەتكىلىكتى. بۇل اقش ارمياسىنىڭ باستى قابىلەتى. قىتاي بۇل سوزدەردە ارتىق كەتپەگەنى ءجون، سەبەبى بۇل تاريحي فاكتىلەر»، – دەدى.

سوڭعى كەزدەرى اقش تەڭىز كۇشتەرى وڭتۇستىك قىتاي تەڭىزىندە بىرقاتار اسكەري جاتتىعۋلاردى وتكىزۋدە. شيشا ارالدارىنا جاقىنداپ بارعان امەريكالىق ەكى سوعىس كەمەسى سولاردىڭ ءبىرى عانا. قىتاي بيلىگى بۇل ارەكەتتەرگە نارازىلىق جولداۋدا. دەگەنمەن، قىتاي ءسىم وكىلى مالىمدەمەسىندە: «اقش-تىڭ وڭتۇستىك قىتاي تەڭىزىندەگى اسكەري كۇشتەرى قىتاي جانە وسى تەڭىزگە كورشىلەس ەلدەردىڭ اسكەري اكتيۆتەرىنەن الدە قايدا كوپ»، – دەدى.

“The Qazaq Times”