رەسمي بەيجىڭنىڭ اقش-قا قارسى ارىز-شاعىمى كوبەيگەنىنە قاراماستان، كەشە اقش قورعانىس ءمينيسترى مالىمدەمە جاساپ، قۇراما شتاتتىڭ ءوز ۇستانىمىندا بەرىك تۇراتىنىن، اسكەري كەمەلەرى وڭتۇستىك قىتاي تەڭىزىندەگى داۋلى ارالداردىڭ ماڭىندا وپەراتسيالاردى ورىنداۋدى جالعاستىراتىنىن ەسكەرتە ايتتى.

امەريكالىق باق-تىڭ حابارىنا قاراعاندا، پەنتاگون باسشىسى جەيمس مەتتيس كەشەگى مالىمدەمەسىندە: «امەريكالىق اسكەري كەمەلەردىڭ ارەكەتى ناۆيگاتسيا بوستاندىعى شەڭبەرىندە. سىزدەر بايقاپ وتىرسىزدار، تەك ءبىر عانا ەل عانا بۇعان قارسى نارازىلىق تانىتىپ وتىر»، – دەگەن.

وسى اپتادا اقش قورعانىس ءمينيسترى شانگري-لا ديالوگىنا قاتىسۋ ءۇشىن سينگاپۋرعا ساپارلاي باراتىن بولادى. اتالعان جينالىس ازيا ەلدەرىنىڭ قورعانىس وكىلدەرى اراسىندا جىل سايىن ءوتىپ كەلەدى. كەزەكتى سامميتتە دە وڭتۇستىك قىتاي تەڭىزى ماسەلەسى ەڭ قىزۋ تالقىعا تيەك بولادى دەپ كۇتىلۋدە.

ەستەرىڭىزگە سالا كەتەيىك، جەكسەنبى كۇنى اقش-تىڭ ەكى اسكەري كەمەسى شيشا ارالدارىنا 20 شاقىرىم ماڭدا سۋ ءۇستى وپەراتسيالارىن وتكىزگەن. بەيجىڭ تارابى بۇنى قىتايدىڭ ەگەمەندىگى مەن تەرريتوريالىق قۇقىعىن بۇزۋ جانە ارانداتۋ دەپ باعالادى. ەكى ەل اراسىندا وسىعان بايلانىستى از بولماعان كىربەڭدىك ورىن الدى.

ەندى مىنە، بەيجىڭ تارابىنىڭ ايىپتاۋلارى مەن ەسكەرتۋىنە قاراماستان، اقش قورعانىس مينيسترلىگى ءوز ۇستانىمىندا قالاتىنىن ءبىلدىرىپ وتىر. قورعانىس مينيستر مەتتيس: «بۇل حالىقارالىق سۋ جولى. كوپتەگەن ەلدەرى ونىڭ پايداسىن كورۋگە قۇقىلى. سوندىقتان ءبىز ءوز ارەكەتىمىزدى جالعاستىرامىز»، – دەپ قايتالادى.

وڭتۇستىك قىتاي تەڭىزى ماسەلەسىندە بەيجىڭ اتالعان تەڭىزدى «تولىعىمەن قىتاي يەلىگىندە» دەپ مالىمدەگەن. ۆەتنام، فيليپپين، مالايزيا، برۋنەي جانە تايۋاننىڭ (تايۆان) بارلىعى دا بۇل ماسەلەدە ءبىر-بىرىنە قاراما-قايشى كوزقاراستار ۇستانادى.

“The Qazaq Times”