اۋستراليا مەن ۆەتنام اراسى جاقىنداعان سايىن قىتاي وقشاۋلانا تۇسپەك

اۋستراليانىڭ (اۆستراليا) سىرتقى ىستەر ءمينيسترى جۋلي بيشوپ بۇگىن حانوي قالاسىنا بارىپ، ۆەتنامداعى رەسمي ساپارىن باستادى. ۆەتنامنىڭ ۆيتسە-پرەمەرى مەن ءسىم باسشىسى بيشوپپەن كەلىسسوزدىڭ العاشقى وتىرىسىن وتكىزدى. اۋستراليا ءسىم باسشىسىنىڭ كەزەكتى ساپارى ەكى ەل باسشىلارىنىڭ ناۋرىزدا نەگىزىن قالاعان اۋستراليا-ۆەتنام ستراتەگيالىق سەرىكتەستىگىنىڭ اياسىندا، قارىم-قاتىناستى دامىتۋعا باعىتتالعان. بۇل تۋرالى WSJ باسىلىمى حابارلادى.

بيشوپ كەزەكتى ساپارىنان بۇرىن جاساعان مالىمدەمەسىندە: «اۋستراليا مەن ۆەتنام قورعانىس جانە قاۋىپسىزدىك، قۇقىق قورعاۋ، ساۋدا، ينۆەستيتسيا جانە ەكونوميكالىق دامۋ سالاسىنداعى ىنتىماقتاستىق ارقىلى ايماقتىق ەكونوميكالىق دامۋ، بەيبىتشىلىك پەن قاۋىپسىزدىككە ىقپال ەتەدى»، – دەپ مالىمدەگەن.

اۋستراليانىڭ ءسىم باسشىسى كەزەكتى ساپارىندا مەكونگ، گاۋلين جانە  دەلتا اراسىن تۇتاستىراتىن كوپىردىڭ اشىلۋ سالتاناتىنا قاتىسادى.  اۋستراليا كوپىر سالۋ ءۇشىن ۆەتنامعا 120 ميلليون اقش دوللارى كولەمىندە كومەك كورسەتكەن.

وڭتۇستىك قىتاي تەڭىزى يەلىك قۇقىعى ماسەلەسىندە، ۆەتنام قىتايدىڭ اۋماقتاعى كەڭەيۋىنە قارسى تۇراتىن بىردەن ءبىر ازيالىق مەملەكەت سانالادى. سوڭعى جىلدارى قىتايدىڭ وڭتۇستىك قىتاي تەڭزىندەگى اسكەري، اكىمشىلىك باقىلاۋ ارەكەتتەرىنىڭ جيىلەۋى اقش، اۋستراليا، جاپونيا ەلدەرىن الاڭداتتى جانە ولاردىڭ ۆەتناممەن ىنتىماقتاستىقتى تەرەڭدەتۋىنە سەبەپ بولدى.

اۋستراليا مەن ۆەتنامنىڭ ىنتىماقتاستىق ورناتقانىنا 45 جىلدان استى. ەكى تاراپ ايماقتىڭ تۇراقتىلىعى مەن قاۋىپسىزدىگى ماسەلەسىندەگى بىرلىگى ارتىپ كەلەدى. بۇل ۇردىستەر قىتاي بيلىگىن ىرىقسىز كۇيگە قاراي يتەرۋدە.

“The Qazaq Times”