قازاقستان مەن داعىستان پاروم بايلانىسىن جانداندىرماق.

رەسەيدەگى قازاق ەلشىلىگىنىڭ مالىمەتىنشە، اقتاۋ قالاسىنا داعىستان رەسپۋبليكاسىنىڭ ۇلتتىق ساياسات مينيسترلىگىنىڭ باسشىسى گازيماگومەد گادجيەۆ باستاعان دەلەگاتسيا رەسمي ىسساپارمەن كەلگەن. ءىسساپار بارىسىندا دەلەگاتسيا مۇشەلەرى اقتاۋ قالاسىنىڭ اكىمى عالىمجان نيازوۆپەن كەزدەسىپ، ەكى جاقتىق قارىم-قاتىناس جانە ماحاچكالا مەن اقتاۋ اراسىنداعى پاروم بايلانىسىن قايتا قالپىنا كەلتىرۋ جونىندە كەلىسسوزدەر جۇرگىزگەن.

ساراپشىلار سوزىنشە، قازىرگى تاڭدا قازاقستان مەن داعىستان اراسىنداعى ساۋدا اينالىمى وتكەن جىلدارمەن سالىستىرعاندا  ءبىرشاما وسكەن. وسىعان بايلانىستى قوس تاراپتىڭ جۇك تاسىمالىندا پاروم بايلانىسىن قايتا جانداندىرۋعا تالپىنىسى كوڭىلگە قونىمدى شەشىم.

ايتا كەتەتىن ءبىر جايت، قازاقستان مەن داعىستان اراسىنداعى پاروم بايلانىسى العاش رەت 1999 جىلى ىسكە قوسىلعان. الايدا كوپ ۇزاماي ەكى ەل اراسىنداعى جۇك تاسىمالىنىڭ از بولۋىنا بايلانىستى پاروم بايلانىسى ءوز جۇمىسىن توقتاتقان.

“The Qazaq Times”