يران ءسىم باسشىسى بەيجىڭدە: قىتاي يران ماسەلەسىندەگى ۇستانىمىن جاريا ەتتى

يراننىڭ سىرتقى ىستەر ءمينيسترى جەۆات زاريف قىتاي ورتالىق قالاسىنا ساپارلاي بارىپ، سول ەلدىڭ ءسىم باسشىسى ۋاڭ ي-مەن كەزدەستى. ەكى ەل مينيسترلەرىنىڭ كەزدەسۋىندە يران يادرولىق ماسەلەسى باستى تاقىرىپ بولدى. بۇل تۋرالى يراندىق IRNA جانە قىتايدىڭ «شينحۋا» اقپاراتتىق اگەنتتىكتەرى حابارلادى.

«شينحۋانىڭ» بۇل تۋرالى حابارىندا، قىتاي سىرتقى ىستەر ءمينيسترى ۋاڭ ي يران يادرولىق ماسەلەسىنە بايلانىستى بارلىق تاراپتارمەن ورتاق كەلىسىم ۇستانىمىندا بولاتىنىن، ءارى تاراپتاردىڭ ورتاق كەلىسىمگە كەلۋىنە بارىنشا كۇش سالاتىنىن جەتكىزگەن. ول سوزىندە: «يران يادرولىق كەلىسىمى اتوم قارۋىنىڭ تارالۋى مەن ءوڭىردىڭ تۇراقتىلىق پەن قاۋىپسىزدىك ماسەلەسىن قامتاماسىز ەتۋدە وتە ماڭىزدى. سوندىقتان، تاراپتاردى كەڭ كولەمدى كەلىسىمگە كەلۋگە شاقىرامىز»، – دەدى.

يران ءسىم باسشىسى زاريف قىتاي تارابىنىڭ «يران يادرولىق كەلىسىمىندە تاباندىلىق كورسەتكەنىنە ريزاشىلىعىن ءبىلدىردى. سونىمەن بىرگە، يران تارابىنىڭ دا كەلىسىمگە تۇراقتىلىق تانىتقان بارلىق تاراپتارمەن جاقىن قارىم-قاتىناستى ساقتايتىنىن جەتكىزدى.

تاۋەلسىز ساراپشىلاردىڭ پىكىرىنە قاراعاندا، قىتاي رەجيمى حالىقارالىق وزەكتى ءارى داۋلى ماسەلەلەردە تاراپ تاڭداپ كورگەن ەمەس. بارلىق تاراپتاردى كەلىسىمگە شاقىرعان سىڭاي تانىتىپ كەلەدى. يران ماسەلەسىندە دە بارلىق تاراپپەن (يران، اقش جانە كەلىسىمگە قول قويعان وزگە ەلدەر) ورتاق قارىم-قاتىناس ۇستاناتىنىن جەتكىزىپ وتىر.

“The Qazaq Times”