ەمومالي راحمون: قيىن-قىستاۋ ۋاقىتتا ءبىز باسەكەلەسپەي بىرلەسىپ جۇمىس ىستەۋىمىز كەرەك

تاجىكستان پرەزيدەنتى ەمومالي راحمون: «قيىن-قىستاۋ ۋاقىتتا ءبىز باسەكەلەسپەي بىرلەسىپ جۇمىس ىستەۋىمىز كەرەك» – دەپ مالىمدەدى.

مامىر ايىنىڭ 4-ءى كۇنى دۋشانبە قالاسىندا وتكەن «تەرروريزمگە قارسى كۇرەس» حالىقارالىق كونفەرەنتسياسىندا: «بەيبىتشىلىك پەن تۇراقتىلىقتى ساقتاۋ دامۋدىڭ باستى كىلتى ەكەندىگى ءسوزسىز. قيىن-قىستاۋ ۋاقىتتا ءبىز باسەكەلەسپەي بىرىگىپ جۇمىس ىستەۋىمىز كەرەك. اۋعانستان اۋماعىنىڭ وزىندە عانا بىلتىرعى جىلى تەررورلىق شابۋىلداردىڭ سالدارىنان 10 مىڭعا جۋىق بەيبىت تۇرعىن زارداپ شەگىپ، 4 مىڭ ادام كوز جۇمدى. كەز كەلگەن مەملەكەت تەرروريزمگە ءبىر ءوزى قارسى تۇرا المايدى. وسىعان بايلانىستى ءبىز تەرروريزممەن كۇرەستە ايماقتىق جانە الەمدىك ارىپتەستىكتى دامىتۋدى قولدايمىز» - دەگەن.

ەستەرىڭىزگە سالايىق، بۇعان دەيىن تاجىكستان ۇلتتىق قاۋىپسىزدىك كوميتەتى «تاليبان» قوزعالىسىنىڭ اۋعان-تاجىك شەكارالىق اۋداندارىنا 7 مىڭنان استام سودىرىن ورنالاستىرعانىن مالىمدەگەن. تاجىكستان شەكارا قىزمەتىنىڭ مالىمەتىنشە، قازىگى ۋاقىتتا 7 مىڭ سودىر 29 اسكەري بازادا وقۋ-جاتتىعۋ جۇمىستارىن وتكىزۋدە.

“The Qazaq Times”