اقش ەكى بىردەي الىپ كەمەسىن قىتاي تەرريتورياسىنا جاقىنداتپاق

سارسەنبى كۇنى اقش تەڭىز كۇشتەرىنىڭ جەتىنشى فلوتى حابارلاما تاراتىپ، «رۋزۆەلد» ۇشاق تاسىمالداۋشى كەمەسىنىڭ مانيلاعا جەتكەنىن، ەكى اي ىشىندە فيليپپينگە جەتىپ بولاتىنىن حابارلادى. بۇل اقش-تىڭ قىتايعا جاقىن سۋ ايدىنىنا باراتىن ەكىنشى سۋپەر تاسىمالداۋشى كەمە بولماق. بۇل تۋرالى VOA اقپاراتتىق سايتى حابارلادى.

«رۋزۆەلد» ۇشاق تاسىمالداۋشى كەمەسىنىڭ كومانديرى، تەڭىز ارميا ادميرالى ستيۆ كوحلەردىڭ (Steve Koehler) ايتۋىنشا، مانيلادان سوعىس ۇشاقتارى مەن باسقارىلمالى زىمىرانداردى تولىقتاپ العاننان كەيىن، «رۋزۆەلد» فيليپپينگە قاراي جولعا شىعادى. ونىڭ ايتۋىنشا اقش-پەن فيليپپين تەڭىز كۇشتەرى ۇزاق ۋاقىتتان بەرى ساقتالىپ كەلە جاتقان ىنتىماقتاستىقتى تەرەڭدەتە تۇسپەك.

«رۋزۆەلد» كەمەسى جولعا شىعۋدان بۇرىن اقش تەڭىز-اسكەري كۇشتەرى وڭتۇستىك قىتاي تەڭىزىندە اسكەري وقۋ-جاتتىعۋ وتكىزگەن. 20 F-18 ۇشاقتارى 20 مينۋت ىشىندە ۇشىپ-قونۋ جاتتىعۋلارىن قامتىعان، تەڭىز كۇشتەرىنىڭ بارلىق قابىلەتىن كورسەتەتىن جاتتىعۋلاردى جاساعان. ءفيليپپيننىڭ اسكەري شەندىلەرى اتالعان وقۋ-جاتتىعۋدى قاداعالاعان. ستيۆ كوحلەردىڭ ايتۋىنشا اقش تەڭىز كۇشتەرىنىڭ وقۋ-جاتتىعۋى كەزىندە قىتايدىڭ سوعىس كەمەلەرى جاقىن ماڭدا ءجۇزىپ وتكەن.

قىتاي مەن فيليپپين اراسىندا تالايدان بەرى وڭتۇستىك قىتاي تەڭىزىنىڭ يەلىك قۇقىعى داۋى شەشىلمەي كەلەدى. 2016 جىلى پرەزيدەنت دۋتتەرت بيلىكتى قولىنا العاننان كەيىن، اقش-پەن تەڭىز كۇشتەرىنىڭ ىنتىماقتاستىعىن ساقتاۋمەن قاتار، قىتايمەن دە قارىم-قاتىناستى جاقسارتۋعا تىرىستى. ول بەيجىڭمەن اراداعى داۋلى ماسەلەلەردى توقتاتىپ، ەكونوميكالىق قارىم ىنتىماقتاستىقتى تەرەڭدەتۋدى قولعا العان. ايتالىق، داۋلى تەڭىز ايدىنىنداعى رەسۋرستاردى ورتاق اشىپ، پايدالانۋ جوبالارىن ورتاعا سالعان.

«رۋزۆەلد» مانيلاعا جەتۋدەن ءبىر كۇن بۇرىن فيليپپين پرەزيدەنتى دۋتتەرت قىتايدىڭ حاينان (Hainan) پروۆينتسياسىنداعى بواو حالىقارالىق فورۋمىنا قاتىسىپ، قىتاي باسشىسى شي جينپيڭمەن كەزدەسۋ وتكىزگەن. حابارعا قاراعاندا، ول بۇل رەت قىتايمەن ميللياردتاعان اقش دوللارى قۇنىنا يە ينۆەستيتسيا جوباسىنا نيەت بىلدىرگەن.

اقش تارابى بولسا وڭتۇستىك قىتاي تەڭىزى ايماعىن ءوز تارابىنان ەشبىر تەرريتوريا رەتىندە يەلىك ەتپەيتىنى، تەك وسى ءبىر ماڭىز تەڭىز تاسىمال جولىنىڭ حالىقارالىق قۇقىققا سايكەس ورتاق پايدالانۋ ماسەلەسىن قورعايتىنىن مالىمدەگەن. اقش تەڭىز ارميا جەتىنشى فلوتىنىڭ مالىمەتىندە، «رۋزۆەلد» فيليپپينگە جەتكەننەن كەيىن اقش تارابىنىڭ وسى مىندەتىن اتقارۋعا تىرىسادى.

 “The Qazaq Times”