فوتو: رەيتەر

«الجيردەگى  اسكەري ۇشاق اپات سالدارىنان كەم دەگەندە 257 ادام كوز جۇمدى» ، - دەپ حابارلايدى «رەيتەر» اقپارات اگەنتتىگى «Ennahar TV» تەلەارناسىنا سىلتەمە جاساپ.

يل-76 اسكەري ۇشاعى الجير استاناسىنا جاقىن ماڭدا ورنالاسقان اۆيابازادان ۇشىپ كەتكەننەن كەيىن قۇلاعان. اپاتتى وقيعا بۋفاريك اۋەجايىنا جاقىن جەردە ورىن العان. اپاتتىڭ سەبەبى ازىرگە بەلگىسىز.  «بي-بي-سي» اقپارات اگەنتتىگىنىڭ حابارلاۋىنشا، قازا تاپقانداردىڭ 10-ى ەكيپاج مۇشەلەرى.

«فرانس پرەسس» اگەنتتىگى ۇشاق اپاتىنان ءتىرى قالعاندار بار دەپ حابارلاۋدا. اۋە كەمەسىندە بولعانداردىڭ اتى-جوندەرى انىقتالۋ ۇستىندە.

ەستەرىڭىزگە سالا كەتسەك، كەشە الجيردە ۇشاق اپاتى بولعان ەدى. «ءال-ارابيا» اگەنتتىگىنىڭ مالىمەتىنشە، ۇشاق ەلدىڭ سولتۇستىگىنەن وڭتۇستىك-باتىسىنا باعىت العان. سول ەلدىڭ قورعانىس مينيسترلىگىنىڭ حابارلاۋىنشا، جولاۋشىلاردىڭ كوپشىلىگى اسكەريلەر مەن ولاردىڭ تۋىستارى.

“The Qazaq Times”