ترامپ باشار اسادتقا ەسكەرتۋ جاسادى. فوتو:The Hill.

ءسۇريا ۇكىمەتىنىڭ مەملەكەتتىك تەلەارنالار ارقىلى تاراتقان حابارىنا قاراعاندا، بۇگىن تاڭەرتەڭ حومس پروۆينتسياسىنداعى اۋە بازاسىنا زىمىران شابۋىلى جاسالىپ، بىرنەشە جاۋىنگەر قازا تاپقان. ءسۇريا كۇشتەرى شابۋىل جاساۋشى اقش-تىڭ سول ەلدەگى قارۋلى كۇشتەرى دەپ كورسەتكەن. بۇل تۋرالى VOA اقپاراتتىق اگەنتتىگى حابارلادى.

بۇل تۋرالى اقش ۇكىمەتىنىڭ جانە قارۋلى كۇشتەرىنىڭ وكىلدەرى مالىمدەمە جاساپ، اتالعان ايىپتاۋدى تەرىسكە شىعاردى. اقش-تىڭ رەسمي وكىلى بۇل تۋرالى: «بۇل ءسۇريا رەجيمىنىڭ سەنبى كۇنى داماسك ماڭىنا جاساعان حيميالىق شابۋىلدى بۇرمالاۋ ءۇشىن جاساعان قادام. اقش تارابىنان مۇنداي زىمىران شابۋىلى بولعان جوق»، – دەدى.

ايتا كەتەيىك وتكەن اپتانىڭ سوڭىندا شىعىس گۋتانىڭ دۋما اۋدانىندا بولعان حيميالىق شابۋىلدان 40 ادام قازا تاۋىپ، جۇزدەن اسا ادام ءتۇرلى دارەجەدە ۋلانعان.

اق ءۇي جەكسەنبى كۇنى كەشتە تاراتقان مالىمدەمەدە، اقش پرەزيدەنتى ترامپ حيميالىق شابۋىلعا بايلانىستى فرانتسيا پرەزيدەنتى ماكرونمەن ارنايى سويلەسكەن. ەكى ەل باسشىسى باشار اساد رەجيمىن سىنعا الىپ، حيميالىق شابۋىلدىڭ جاۋاپكەرشىلىگىن ءوز مويىنىنا الۋى كەرەك دەپ ەسكەرتكەن. ءارى الداعى ۋاقىتتا قارسى شارالار قولدانۋ تۋرالى كەڭەسكەن.

جەكسەنبى كۇنى قۇراما شتات پرەزيدەنتى تۆيتتەر پاراقشاسىندا: «سەنبىدەگى حيميالىق شابۋىلدى جاساۋشى، بۇل اۋىر شىعىندى ءوز موينىنا الۋى كەرەك»، – دەگەن پىكىرىن بىلدىرگەن.

“The Qazaq Times”