دۋما اۋدانى ءۇشىن تالاس سوعىسى جالعاسۋدا. فوتو: newsbomb.gr.

اپتا سوڭىندا ءسۇريادا تاعى دا حيميالىق شابۋىلدان 40 ادام قازا تاپتى. ۋلى گازبەن جاسالعان شابۋىل باشار اساد كۇشتەرى جاعىنان شىعىس گۋتاداعى دۋما اۋدانىندا بولعان. بۇل ءسۇريا وپپوزيتسيالىق توپتارىنىڭ باقىلاۋىنداعى سوڭعى اۋدان سانالادى. حيميالىق شابۋىلدان جۇزدەن اسا بەيبىت تۇرعىننىڭ زارداپ شەككەنىن وپپوزيتسيالىق توپتاردىڭ جەتەكشىلەرى مالىمدەدى. ولار الداعى ۋاقىتتا قازا بولعاندار سانىنىڭ ارتا ءتۇسۋى مۇمكىن ەكەنىن العا تارتقان. بۇل تۋرالى «شينلاڭ» اقپاراتتىق سايتى حابارلادى.

سۇرياداعى ادام قۇقىعىن قورعاۋ ۇيىمىنىڭ 4 ءساۋىر كۇنى جاريالاعان مالىمەتىنە قاراعاندا، ءسۇريا سوعىسى باستالعالى بەرى باشار اساد كۇشتەرى 214 رەت حيميالىق شابۋىل جاساعان. حان-شەيحۋن قىرعىنىنان كەيىن دە 11 رەت حيميالىق شابۋىل جاسادى دەپ ايىپتادى.

رەسەيدىڭ كەپىلدىگىمەن شىعىس گۋتادا بەيبىت حالىقتى ەۆاكۋاتسيالاۋ 22 ناۋرىز كۇنى باستالعان بولاتىن. ەكى تاراپ تەك دۋما اۋدانىنىڭ يەلىگى تۋرالى كەلىسىمگە كەلە المادى. وسىدان بۇرىن ۇكىمەتكە قارسى توپتاردىڭ اتالعان اۋداندى تاستاپ كەتەتىنى دە حابارلانعان بولاتىن. الايدا، تاراپتاردىڭ كەلىسسوزدەرى شابۋىلدارعا توسقاۋىل قويا المادى. مالىمەتتەرگە قاراعاندا، دۋما اۋدانىندا كەمىندە 100 تۇرعىن قورشاۋدا قالعان.

 “The Qazaq Times”