قازاقستان مەن يران قورعانىس مينيسترلىگىنىڭ وكىلدەرى ماسكەۋدە كەزدەستى

قازاقستان مەن يران قورعانىس مينيسترلەرى ماسكەۋدە كەزدەستى. رف قورعانىس مينيسترلىگى جاعىنان ۇيىمداستىرىلعان حالىقارالىق قاۋىپسىزدىك جونىندەگى VII ماسكەۋ كونفەرەنتسياسى اياسىندا قر قورعانىس مينيسترلىگىنىڭ وكىلدەرى ير قورعانىس ءمينيسترى باستاپ كەلگەن وكىلدەرمەن كەزدەسىپ، ەكىجاقتى ماڭىزدى ماسەلەلەردى تالقىلاعان.

قر قورعانىس مينيسترلىگىنىڭ رەسمي سايتى كورسەتكەن مالىمەتكە قاراعاندا، ماسكەۋ كونفەرەنتسياسىندا، تەرروريزمگە قارسى كۇرەستەگى وزەكتى ماسەلەلەر، ەۋروپا مەن تاياۋ-شىعىستاعى قاۋىپسىزدىك ماسەلەلەرى جانە ازيا-تىنىق مۇحيتى مەن ورتا ازيا قاۋىپسىزدىگىنە قاتىستى تاقىرىپتار تالقىعا تۇسكەن.

يراننىڭ IRNA اقپاراتتىق اگەنتتىگىنىڭ حابارىنا قاراعاندا، قازاقستان مەن يران قورعانىس مينيسترلىگىنىڭ باسشىلارى مەن لاۋازىمدى وكىلدەرى ەكى ەلدىڭ تاريحي، ءدىني جانە مادەني قارىم-قاتىناستارىنىڭ قاۋىپسىزدىك ماسەلەسىندەگى رولدەرى تۋرالى ءسوز ەتكەن. ير قورعانىس ءمينيسترى: «قازاقستان ايماقتىڭ تۇراقتىلىعى مەن قاۋىپسىزدىگىن ساقتاۋدا، اسىرەسە سۇرياعا قاتىستى استانا كەلىسسوزىندە، سونداي-اق يادرولىق ماسەلە توڭىرەگىندەگى كەلىسسوزدە شەشۋشى ءرول اتقاردى»، – دەپ باعالاعان.

“The Qazaq Times”