يران ورمۋز بۇعازىن تولىق باقىلاۋىنا الۋعا تىرىسۋدا

يران ورمۋز بۇعازىنىڭ قاۋىپسىزدىگىن قامتاماسىز ەتەدى. بۇنداي مالىمدەمەنى ير رەۆوليۋتسيا ساقشىلارى كورپۋسى تەڭىز كۇشتەرىنىڭ قولباسشىسى مالىمدەدى. ول مالىمدەمەسىندە يران تەڭىز كۇشتەرى حالىقارالىق سۋ جولى، ترانسايماق سانالاتىن پارسى شىعاناعىنداعى قاۋىپسىزدىك پەن ءتارتىپتى ساقتاۋعا تولىقتاي قابىلەتتى. 

باندار-ابباستاعى تەڭىز كۇشتەرىن ارالاۋ كەزىندە يران رەۆوليۋتسيا ساقشىلارى كورپۋسىنا قاراستى تەڭىز كۇشتەرىنىڭ قولباسشىسى اليرەزا تانگيسيري: "يران تەڭىز كۇشتەرى پارسى شىعاناعىندا تارتىپسىزدىك پەن بىلىقپالىق ورناتۋعا جول بەرمەيدى. تۇراقتىلىقتى ساقتاپ، قاۋىپسىزدىك ورناتۋ مىندەتىن وتەيدى",  – دەپ مالىمدەدى.

ول سونداي-اق، پارسى شىعاناعى مەن ونىڭ اشىق تەڭىزگە شىعاتىن وتكەلى ورمۋز بۇعازىنىڭ قاۋىپسىزدىگى حالىقارالىق ترانسايماق رەتىندە اسا ماڭىزدى ەكەنىن، سوندىقتان اتالعان سۋ ايدىنىنداعى كەز-كەلگەن تارتىپسىزدىككە جول بەرمەيتىنىن ەسكەرتتى.

اقش پەن يران قاتىناسىنىڭ شيەلەنىسۋىنە بايلانىستى حالىقارالىق اسا ماڭىزدى مۇناي تاسىمال جولى سانالاتىن پارسى شىعاناعى مەن ورمۋز بۇعازىنىڭ قاۋىپسىزدىگى شىعىس-باتىس ەلدەرىن الاڭداتتى. شىعاناقتا بەلسەندىلىك تانىتقان اقش، يران جانە ساۋد ارابياسىنىڭ كۇشتەرى قاقتىعىس قاۋپىن دە كۇشەيتۋدە. بۇدان بۇرىن اتالعان سۋ الابىندا جانە وعان جاقىن تەڭىزدەردە مۇناي تاسىمال كەمەلەرىنە شابۋىلدار جاسالعان بولاتىن.

“The Qazaq Times”