فوتو:QT.

ۇلتتىق جۋرناليستىك زەرتتەۋ ورتالىعى الماتى قالاسى ءدىن ىستەرى جونىندەگى باسقارماسىمەن بىرلەسە وتىرىپ، "نۇر وتان" پارتياسىنىڭ قولداۋىمەن جۋرناليستەر اراسىندا بايقاۋ جاريالايدى.

بۇل تۋرالى بۇگىن "نۇر وتان" پارتياسىنىڭ الماتى قالالىق فيليالىندا جۋرناليستەرگە ارنالعان ءباسپاسوز وتىرىسىندا ارنايى تالقىلادى. جيىن بارىسىندا ءسوز العان الماتى قالالىق ءدىن ىستەرى جونىندەگى باسقارماسىنىڭ باسشىسى ايدار راحىمجانۇلى، ءدىننىڭ وزەكتى ماسەلەلەرىنە بايلانىستى جۋرناليستەر اراسىندا بايقاۋ جاريالايتىنىن حابارلادى. "بايقاۋدىڭ ماقساتى نە؟" دەگەن سۇراققا كەلسەك، قازىر بۇكىل ەل بولىپ، قوعام بولىپ ءبارىمىز ءدىني ەكسترەميزم، راديكاليزم سياقتى ماسەلەلەرگە ەرەكشە كوڭىل ءبولىپ جاتىرمىز. ونىڭ ۇستىنە جۋرناليستەر قاۋىمى دا اتسالىسىپ، ءارتۇرلى ماسەلەلەرگە قاتىستى اقپاراتتار بەرىپ جاتىر. دەسەك تە، جۋرناليستەردىڭ بەلسەندى بولىپ، وسى تاقىرىپقا قاتىستى حالىققا وي سالىپ، كوبىرەك دۇرىس مالىمەت بەرۋلەرىن قامتاماسىز ەتۋ ءۇشىن بايقاۋ ۇيىمداستىرۋدى ءجون كوردىك. سەبەبى قازىرگى كەزدە اقپارات قۇرالدارىنىڭ ءرولى وتە زور" ، -دەدى.

ەندى بايقاۋ تۋرالى اقپاراتقا كەلەر بولساق، بايقاۋ مەرزىمى 2018 جىلدىڭ 1 ءساۋىرى مەن 1 قازانى ارالىعىن قامتيدى. جەڭىمپازداردى ماراپاتتاۋ 18 قازان — قر رۋحاني كەلىسىم كۇنى مەرەكەسى كۇنى قارساڭىندا الماتى قالاسىندا وتپەك. بايقاۋ جۇلدەسىنىڭ جالپى قورى — 1 000 000 تەڭگە.

"ەلدەگى تۇراقتىلىق پەن قوعامداعى بەيبىتشىلىكتىڭ ساقتاپ، باياندى ەتۋ ءۇشىن مەملەكەت تاراپىنان جۇزەگە اسىرىلىپ جاتقان بىرقاتار ءىس-شارالارعا قاراماستان، سوڭعى ۋاقىتتا كەيبىر جاستاردىڭ جات اعىمداعى كوزقاراستاردىڭ ىقپالىنا ۇشىراپ، ەكسترەميستىك ارەكەتتەرگە بوي الدىرۋى بايقالۋدا. ويتكەنى اشىق اقپارات كەڭىستىگىن ءوز ماقساتىنا پايدالانعان تەرىس پيعىلدى اعىمدار ەلىمىزدىڭ اۋماعىندا دا كەزدەسۋدە. سوندىقتان وسى باعىتتاعى كۇرەستىڭ نەگىزگى تەتىگى — تۇرعىنداردىڭ ءدىني ساۋاتتىلىعىن ارتتىرىپ، اقپاراتتىق ناسيحاتتىق جۇمىستاردى كۇشەيتۋ", - دەيدى الماتى قالالىق فيليالى قوعامدىق قابىلداۋ ءبولىمىنىڭ جەتەكشىسى الماجان اسكەربايقىزى.

فوتو:QT.

بيىلعى بايقاۋدىڭ وتكەن جىلعى بايقاۋدان ازداعان ايىرماشىلىعى بولماق. بىلتىر  كەز كەلگەن جۋرناليست وزدەرىنىڭ جۇمىس ورىندارىنان انىقتاما قاعازدارىن الىپ كەلۋگە مىندەتتەلگەن. سونىمەن قاتار، جازعان ماقالالارى مەن روليكتەرىن بەلگىلى ءبىر ورىنعا اكەلىپ تاپسىرۋ تالاپ ەتىلگەن. بيىل وسىنىڭ ءبارىن جەڭىلدەتىلگەن. سەبەبى، ولاردىڭ بارلىعى ەلەكتروندى تۇردە قابىلدانادى. سونىمەن قاتار تاقىرىپ اۋقىمىن كەڭەيتىلگەن. "...ويتكەنى، بىلتىر ءبىزدىڭ جوبامىزعا قالامگەرلەر مەن عالىمدار اتسالىسساق دەگەن ۇسىنىس تۇسكەندىكتەن، بيىل جوبانىڭ اياسىن كەڭەيتىپ، وعان قالامگەرلەر، پۋبليتسيستەر، عالىمدار جانە جۋرناليستەر دە قاتىسۋعا مۇمكىندىك الدى.سونىمەن قاتار، وسى ماسەلەگە بۇرىننان قالام تەربەپ جۇرگەن ازاماتتاردىڭ بارىنە اشىق دەپ جاريالانۋدا. بايقاۋعا قاتىستى تاعى ءبىر ماڭىزدى ماسەلە — ءدىندى ناسيحاتتاماۋ، كەرىسىنشە اقپاراتتاندىرۋ.  كەز كەلگەن قازاق ءجۋرناليسى قازىرگى ۋاقىتتا اقپاراتتىق قامتاماسىز ەتۋ تۇرعىسىنان وسى ەكسترەميزم، راديكاليزم اسەلەلەرىن تالقىلاپ جازىپ، حالىقتى اعارتۋدا. ۇلكەن قىزمەتتەر اتقارىپ جۇرگەندىكتەن ولاردى دا ىنتالاندىرىپ قويعان دۇرىس. سوندىقتان بۇل بايقاۋ وسى باعىتتا تۋىنداعان جوبا ەدى", - دەيدى  "ۇلتتىق جۋرناليستىك زەرتتەۋ ورتالىعى" باسشىسى دارمەن سمايىلوۆ.

بايقاۋ تومەندەگىدەي بىرنەشە نوميناتسيالار بويىنشا جۇرگىزىلەدى:

  • ەڭ ۇزدىك الەۋمەتتىك روليك;
  • ەڭ ۇزدىك تەلەۆيزيالىق باعدارلاما;
  • ەڭ ۇزدىك راديوباعدارلاما;
  • ينتەرنەت رەسۋرستاعى قازاق تىلىندەگى ەڭ ۇزدىك ماقالا;
  • ينتەرنەت رەسۋرستاعى ورىس تىلىندەگى ەڭ ۇزدىك ماقالا;
  • مەرزىمدى باسىلىمدارداعى قازاق تىلىندەگى ەڭ ۇزدىك ماقالا;
  • مەرزىمدى باسىلىمدارداعى ورىس تىلىندەگى ەڭ ۇزدىك ماقالا;
  • الەۋمەتتىك جەلىلىلەردەگى ەڭ بەلسەندى قولجەتىمدى توپ;
  • ەڭ بەلسەندى بلوگەر.

بايقاۋ شارتتارى: الماتى قالاسىندا تىركەلگەن نەمەسە تىلشىلەر قوسىنى بار باق-تاعى كەز كەلگەن جۋرناليست، سونداي-اق عالىم، كوسەمسوزگەر، قالامگەر قاتىسا الادى. باق باسشىلىعىنىڭ رۇقساتى تالاپ ەتىلمەيدى. بايقاۋ ەك ىتىلدە وتەدى. بايقاۋعا 2018 جىلدىڭ 1 ساۋىرىنەن باستاپ 1 قازان ارالىعىندا جاريالانعان ماتەريالدار قابىلدانادى.

باستى قويىلاتىن تالاپ — قازاقستاننىڭ زايىرلى مەملەكەتتىك قۇرىلىمىن قاراپايىم ءارى ۇعىنىقتى تىلمەن ءتۇسىندىرۋ، مەملەكەتتىك ساياساتتىڭ زاڭنامالىق تالاپتارىن ۇعىندىرۋ، ءدىن اتىن جامىلعان ەكسترەميستىك اعىمداردى اشكەرەلەۋ ، ءداستۇر مەن ءدىننىڭ ءوزارا بايلانىسىن جەتكىزۋ، ءدىني ەكسترەميزمنىڭ الدىن الۋ، تەرىس ءدىني توپتاردىڭ يدەولوگياسى مەن ولاردىڭ زياندىعىن اشىپ كورسەتۋ. \قانداي دا ءبىر ءدىني ۇستانىمدى نەمەسە ءدىندى ناسيحاتتاۋعا باعىتتالعان ماتەريالدار قابىلدانبايدى.

بايقاۋعا قاتىسۋشىلار ءوز ماتەريالدارىن ۇيىمداستىرۋ كوميتەتىنىڭ uzhzo2005@mail.ru ەلەكتروندى پوشتاسىنا (بايلانىس تەلەفونى: 8 777 565 40 78) جىبەرە الادى.

“The Qazaq Times”