كيم جوڭ ۋن مەن ترامپتىڭ كەزدەسۋى مامىر ايىندا بولادى دەپ كۇتىلۋدە. فوتو: voachinese.

سولتۇستىك كورەيا باسشىسى كيم جوڭ ۋن (Kim Jong Un/كيم چەن ىن) قىتاي باسشىسىمەن كەزدەسۋ كەزىندە، كورەي تۇبەگىنىڭ يادرولىق قارۋسىزدانۋ ءىسىن جۇزەگە اسىرۋعا نيەتتى ەكەنىن جەتكىزگەن ەدى. بىرقاتار ساراپشىلار بۇل تۋرالى: «كيم جوڭ ۋن كورەي تۇبەگىن يادرولىق قارۋسىزدانۋى تۋرالى كوزقاراسى ۋاشينگتوننىڭ (ۆاشينگتون) ويىمەن بىردەي شىقپاۋى مۇمكىن»، – دەگەن كوزقاراس ءبىلدىردى. بۇل تۋرالى VOA اقپاراتتىق سايتى حابارلادى.

قىتايدىڭ رەسمي اقپارات اگەنتتىگى «شينحۋانىڭ» حابارىنا قاراعاندا، كيم جوڭ ۋن قىتايداعى ساپارىندا تۇبەكتىڭ يادرولىق قارۋسىزدانۋىن قولدايتىنىن اشىق بىلدىرگەن. «شينحۋانىڭ» بۇل حابارى وڭتۇستىك كورەيا قاۋىپسىزدىك كەڭەسشىسىنىڭ 8 ناۋرىز كۇنى ۋاشينگتوندا بەرگەن مالىمەتىمەن سايكەس كەلەدى. ول ۋاشينگتون ساپارىنان بۇرىن سولتۇستىك كورەياعا ساپارلاي بارىپ، كيم جوڭ ۋنمەن كەزدەسكەن ەدى.

كيم جوڭ ۋن مەن بەتپە-بەت كەزدەسۋگە كەلىسىم بەرگەن ترامپ، ونىڭ قىتاي باسشىسىمەن كەزدەسۋىنە وڭ باعا بەردى. ول شي جينپيڭ مەن كيم جوڭ ۋننىڭ كەزدەسۋىن «الداعى كەزدەسۋگە ۇلكەن جول اشتى» دەپ باعالاعان.

دەگەنمەن، كەيبىر ساراپشىلاردىڭ پىكىرىنە قاراعاندا، ءىستىڭ دامۋى مۇنداي قاراپايىم، ءارى جاعىمدى بولا قويۋى ەكى تالاي. ساراپشىلار كيم جوڭ ۋننىڭ بۇل جاساپ جاتقان قادامدارى قۇراما شتاتتىڭ سولتۇستىك كورەيانى يادرولىق قارۋسىزداندىرۋ ءۇشىن جاسايتىن ارەكەتتەرىن قيىنداتا ءتۇسۋى مۇمكىن دەپ قارايدى. ايتالىق، كيم جوڭ ۋن «يادرولىق قارۋسىزداندىرۋ پروتسەسىن «بىرتە-بىرتە» ىلگەرىلەتىپ، سول ارقىلى اقش-تىڭ سولتۇستىك كورەيانىڭ بۇل وڭدى قادامىنا قارسى «سينحروندى شارالار» قابىلداۋىن كۇتۋدە. بۇل ونىڭ اقش پەن وڭتۇستىك كورەياعا قاراتقان شارتى دەۋگە بولادى.

دەمەك، سولتۇستىك كورەيا اقش پەن وڭتۇستىك كورەيا ويلاعانداي بىردەن يادرولىق قارۋىنان باس تارتا قويمايدى. كەرىسىنشە، ونى كەزەڭدەرگە ءبولىپ، بىرتە-بىرتە جۇزەگە اسىرۋعا تىرىسادى. ءارى ول ءاربىر قادامىندا قارسى تارابىنان ۇلكەن قارىمجى كۇتەدى دەپ قورىتىندىلاۋعا بولادى.

سولتۇستىك كورەيانىڭ قانداي ناقتى قادامدار ارقىلى تۇبەكتىڭ يادرولىق قارۋسىزدانۋىن جۇزەگە اسىراتىنى ءساۋىردىڭ سوڭعى كۇندەرى بەلگىلى بولادى. ەكى كورەيا ءساۋىردىڭ 27 كۇنى، ەكى ەل شەكاراسىندا جوعارى دەڭگەيدەگى ۇكىمەتتىك كەزدەسۋ وتكىزۋگە ۋاعدالاسىپ وتىر.

“The Qazaq Times”