Kim Joñ Un men Tramptıñ kezdesui mamır ayında boladı dep kütilude. Foto: voachinese.

Soltüstik Koreya basşısı Kim Joñ Un (Kim Jong Un/Kim Çen In) Qıtay basşısımen kezdesu kezinde, Korey tübeginiñ yadrolıq qarusızdanu isin jüzege asıruğa nietti ekenin jetkizgen edi. Birqatar sarapşılar bwl turalı: «Kim Joñ Un Korey tübegin yadrolıq qarusızdanuı turalı közqarası Uaşingtonnıñ (Vaşington) oyımen birdey şıqpauı mümkin», – degen közqaras bildirdi. Bwl turalı VOA aqparattıq saytı habarladı.

Qıtaydıñ resmi aqparat agenttigi «Şinhuanıñ» habarına qarağanda, Kim Joñ Un Qıtaydağı saparında tübektiñ yadrolıq qarusızdanuın qoldaytının aşıq bildirgen. «Şinhuanıñ» bwl habarı Oñtüstik Koreya qauipsizdik keñesşisiniñ 8 naurız küni Uaşingtonda bergen mälimetimen säykes keledi. Ol Uaşington saparınan bwrın Soltüstik Koreyağa saparlay barıp, Kim Joñ Unmen kezdesken edi.

Kim Joñ Un men betpe-bet kezdesuge kelisim bergen Tramp, onıñ Qıtay basşısımen kezdesuine oñ bağa berdi. Ol Şi Jinpiñ men Kim Joñ Unnıñ kezdesuin «aldağı kezdesuge ülken jol aştı» dep bağalağan.

Degenmen, keybir sarapşılardıñ pikirine qarağanda, istiñ damuı mwnday qarapayım, äri jağımdı bola qoyuı eki talay. Sarapşılar Kim Joñ Unnıñ bwl jasap jatqan qadamdarı Qwrama Ştattıñ Soltüstik Koreyanı yadrolıq qarusızdandıru üşin jasaytın äreketterin qiındata tüsui mümkin dep qaraydı. Aytalıq, Kim Joñ Un «yadrolıq qarusızdandıru procesin «birte-birte» ilgeriletip, sol arqılı AQŞ-tıñ Soltüstik Koreyanıñ bwl oñdı qadamına qarsı «sinhrondı şaralar» qabıldauın kütude. Bwl onıñ AQŞ pen Oñtüstik Koreyağa qaratqan şartı deuge boladı.

Demek, Soltüstik Koreya AQŞ pen Oñtüstik Koreya oylağanday birden yadrolıq qaruınan bas tarta qoymaydı. Kerisinşe, onı kezeñderge bölip, birte-birte jüzege asıruğa tırısadı. Äri ol ärbir qadamında qarsı tarabınan ülken qarımjı kütedi dep qorıtındılauğa boladı.

Soltüstik Koreyanıñ qanday naqtı qadamdar arqılı tübektiñ yadrolıq qarusızdanuın jüzege asıratını säuirdiñ soñğı künderi belgili boladı. Eki Koreya säuirdiñ 27 küni, eki el şekarasında joğarı deñgeydegi ükimettik kezdesu ötkizuge uağdalasıp otır.

“The Qazaq Times”