اق ءۇي: رەسەي ديپلوماتتاردى قۋالاۋمەن ءوزىن اقتاي المايدى

اقش-تىڭ رەسەيلىك ديپلوماتتاردى ەلدەن شىعارۋ شەشىمىنە ماسكەۋ تارابى دا ءوز جاۋابىن قايتارۋدا. كەشە كەشتە وتكىزىلگەن ءباسپاسوز كونفەرەنتسياسىندا، رەسەي ءسىم باسشىسى سەرگەي لاۆروۆ اقش-تىڭ پەتەربورداعى باس ەلشىلىگى دە جابىلۋى مۇمكىن ەكەنىن ايتتى. سونىمەن بىرگە، رەسەيدىڭ ەلدەن شىعاراتىن امەريكالىق ديپلوماتتارىنىڭ سانى اقش-تان قۋىلعان رەسەيلىك ديپلوماتتاردىڭ سانىمەن بىردەي بولاتىنىن دا اتاپ ءوتتى. بۇل تۋرالى VOA اقپاراتتىق سايتى حابارلادى.

رەسەي سىرتقى ىستەر مينيسترلىگىنىڭ مالىمدەمەسىندە، اقش-تىڭ ماسكەۋدەگى ەلشىلىگىنەن 58 ديپلوماتتى جانە ەكاتەرينبۋرگ قالاسىنداعى كونسۋلدىقتان ەكى قىزمەتكەردى ەلدەن شىعاراتىنى ايتىلعان. ماسكەۋ شەشىمىنە سايكەس بۇلار رەسەي اۋماعىنان 5 ساۋىرگە دەيىن كەتىپ بولۋى كەرەك.

اق ءۇي تارابى كرەملدىڭ بۇل قادامىنا پىكىر ءبىلدىرىپ: «بۇل كۇتىلمەگەن ءىس ەمەس، بىراق بۇدان قۇراما شتات ەمەس رەسەيدىڭ ءوزى كوبىرەك زارداپ شەگەدى. رەسەي ءوزىن قۇرباندىق رەتىندە قاراماي، بۇل ارەكەتتەرمەن ءوزىن اقتاپ الامىن دەپ ويلاماۋى كەرەك»، – دەلىنگەن.

رەسەيدىڭ توڭتەرىس ارەكەتىنە بايلانىستى اقش تارابى ۋاقىتشا قارسى شارالاردى توقتاتا تۇرۋى مۇمكىن دەگەن بولجامدار ايتىلۋدا.

 “The Qazaq Times”