ەلەكتر قۋاتتى جاڭا موتوتسيكلدىڭ كونتسەپتسياسى ۇسىنىلدى

Alta Motors كومپانياسى كەز كەلگەن جولداردا جۇرەتىن ەلەكتريكالىق موتوتسيكلدىڭ كونتسەپتسياسىن ۇسىندى. بۇل تۋرالى Naked-science حابارلادى.

اراعا بىرنەشە ايلار سالىپ، ستارتاپ Alta Motors ءوزىنىڭ تۇڭعىش موتوتسيكلدەرىن نارىققا شىعارعان. سونىمەن قاتار، ەلەكتر قۋاتىمەن جۇرەتىن موتوتسيكلدىڭ كونتسەپتسياسىن ۇسىندى. ونىڭ جاسالۋىنا پلاتفورما رەتىندە كومپانيانىڭ ءبىرىنشى ءونىمى – Redshift موتوتسيكلى بولماق.

ءبىرىنشى وندىرىستىك وبەكتىنى جاساپ شىعارۋ مەن ديلەرلىك جەلى ۇيىمداستىرۋ ءۇشىن، سونداي-اق Redshift موتوتسيكلىنىڭ العاشقى مودەلىن جاساپ شىعارۋ ءۇشىن، كاليفورنيالىق Alta Motors ستارتاپىنا 6 جىلدان اسا ۋاقىت قاجەت بولدى. بۇل – جەڭىل ەلەكترلى موتوتسيكل «جولسىز» (جول سالىنباعان)  جەرلەردە جۇرۋگە ارنالعان. ەكى ءتۇرى بار: ءبىرىنشىسى، موتوكروسسقا ارنالعان نۇسقاسى – MX. ەكىنشىسى، ۇزاق جولعا ارنالعان – SM. ايتا كەتەيىك، بۇل موتوتسيكل مودەلدەرى ارنايى موتوجارىستا جەڭىسكە جەتكەن جۇرگىزۋشىنىڭ ارقاسىندا تانىمال بولدى. سەبەبى، ول قاتىسۋشى ءدال وسى Redshift-ءتى پايدالانعان.

Street Tracker موتوتسيكلدەرىنىڭ انونسى Facebook-تەگى Alta Motors رەسمي پاراقشاسىندا كورسەتىلدى. وكىنىشكە وراي، دايىنداۋشىلار كونتسەپتتىڭ تەك ءبىر سۋرەتىن عانا كورسەتكەن جانە ارنايى بەلگىلەرى تۋرالى ەش اقپارات بەرمەگەن. دەگەنمەن، جاڭا ەلەكترلى موتوتسيكدىڭ ءوزىن (جوعارىدا تەك كونتسەپسياسىن ۇسىندى دەگەن بولاتىنبىز) 10-12 اقپاندا، One Moto Show-دا كورسەتپەك.

“The Qazaq Times”