مالالا يۋسۋفزاي نوبەل بەيبىتشىلىك سىيلىعىنىڭ لاۋرەاتى مالالا يۋسۋفزاي . فوتو: Live In Canada.

الەمدەگى ەڭ جاس نوبەل بەيبىتشىلىك سىيلىعىنىڭ يەگەرى پاكىستاندىق مالالا يۋسۋفزاي بەس جىلدان كەيىن ەلىنە قايتىپ ورالدى. بەس جىل بۇرىن ول تاليپتەردىڭ وعىنان جارالانعان ەدى. مۇسىلمان قىزداردىڭ ءبىلىم الۋ قۇقىعىن قورعاعان مالالا الەمدەگى ەڭ تانىمال ادامداردىڭ ءبىرى. ءتىپتى باتىس ەلدەرى ونى «قىزداردىڭ ءبىلىم الۋ قۇقىعىنىڭ سيمۆولىنا» بالايدى. ول بۇگىن تاڭەرتەڭ اتا-اناسىمەن بىرگە يسلاماباد اۋەجايىنا بارىپ قوندى. بۇل تۋرالى BBC حابارلادى.

مالالا 2009 جىلدان باستاپ تاليپتەردىڭ بيلىگى استىندا ءومىر ءسۇرىپ جاتقان جەرلەستەرى تۋرالى BBC-ءدىڭ ءۇردى تىلىندەگى سايتىندا جەكە بلوگىنا جازىپ، تانىمال بولا باستاعان. سول كەزدە مالالانىڭ تۋعان ولكەسى سۆاتتى تاليبان كۇشتەرى باقىلاۋىندا ۇستاپ تۇرعان. كەيىن پاكىستان ۇكىمەتى بۇل اۋماقتى ءوز قاراماعىنا قايتاردى. بەس جىل بۇرىن مالالا يۋسۋفزايعا مەكتەپتەن قايتار جولىندا ءدىن فاناتتارى شابۋىل جاساعان. باسىنا وق تيگەن مالالا اۋرۋحاناعا جەتكىزىلەدى، كەيىننەن ۇلىبريتانيادا ەمدەلدى.

وقۋىن جالعاستىرعان ول قاراپايىم وقۋشى بولىپ قالماعان. ول ءوزىنىڭ ومىرىنەن كىتاپ جازىپ جاريالاعان. بۇل كىتابىن ۇلىبريتانيا پاتشايىمىنا كەزىككەندە سىيعا دا بەرگەن بولاتىن. مۇسىلمان قىزدارىنىڭ ءبىلىم الۋ قۇقىعى ءۇشىن كۇرەسكەن مالالا نوبەل بەيبىتشىلىك سىيلىعىن الدى جانە بۇۇ تاريحىنداعى «ەڭ جاس ەلشى» اتاعىن العان. بۇۇ باس حاتشىسى انتونيۋ گۋتەررەش: «الەمدەگى ەڭ ماڭىزدى نارسە – بارلىق بالالاردىڭ ءبىلىم الا الۋى. ال، مالالا بۇنىڭ سيمۆولى»، – دەپ باعالاعان.

ادام قۇقىعىن قورعاۋشى جاس اكتيۆيست تۋعان ەلىندە 4 كۇندىك ساپاردا بولادى. ساپارىنىڭ كۇن تارتىبىندە ەلدىڭ پرەمەر-مينيسترىمەن كەزدەسۋ دە ورنالاستىرىلعان. ول ەلىندەگى جانە الەمدەگى بالالاردى ءبىلىم الۋ قۇقىعىن قورعاۋعا شاقىرعان. پاكىستان ۇكىمەتىنىڭ مالىمەتىنە سەنسەك، مالالانىڭ ارەكەتىنەن كەيىن پاكىستاندا ايەلدەردىڭ زورلىق-زومبىلىققا ۇشىراۋ كورسەتكىشى تومەندەگەن. 17 جاستاعى مالالانىڭ ارمانى – پاكىستاننىڭ پرەمەر-ءمينيسترى بولۋ.

 “The Qazaq Times”