ەو-عا مۇشە ماجارستان بوسقىنداردى بوپسالاۋىن قويار ەمەس

رەسمي مالىمەتتەر بويىنشا تەرريتورياسىندا 781 مىڭ بوسقىنى بار، ەۋروداققا مۇشە ماجارستان (ۆەنگريا) ۇكىمەتىنىڭ بوسقىندارعا قاتىستى قاتاڭ ۇستانىمىنا ەۋروكوميتەتتىڭ كوڭىلى تولماي وتىر. بۇۇ-نىڭ بوسقىندار ءىسى جونىندەگى جوعارى كوميسسارىنىڭ ماجارستان ءباسپاسوز حاتشىسى ەرنو سيمون دا ماجارستاننىڭ سوڭعى ۋاقىتتا باسساۋعا سۇراۋشى بوسقىنداردى مۇمكىندىكتەرىنەن ايىرعانى تۋرالى حابارلادى.

ماجارستان كوشى-قون جانە باسساۋعا كەڭسەسى بەرگەن مالىمەت بويىنشا، تەك قانا 781 بوسقىن تۇراتىن وسى ەلدە ۇكىمەت اسا قاتال ساياسات ۇستانۋعا بەكىنگەن. ماجار بيلىگى ءبىر اپتادا ورتا ەسەپپەن تەك قانا 7-8 بوسقىنعا باسساۋعا ءوتىنىشىن جاساۋعا رۇقسات بەرگەن. ال، "aa.com.tr" اقپاراتتىق اگەنتتىگى بوسقىن مارتەبەسىمەن ماجارستان ارقىلى ەۋروداققا مۇشە ەلدەرگە ءوتۋ ءۇشىن سەربيادا مىڭداعان بوسقىننىڭ كەزەكتە تۇرعانى تۋرالى حابارلاۋدا.

قازىرگى ۋاقىتتا ءبىر دە ءبىر جاننىڭ ماجارستاندا باسساۋعا سۇراۋعا ءوتىنىش جاساي الماي وتىرعانىن تىلگە تيەك ەتكەن سيمون، نەگىزىندە بۇل جاعدايدىڭ جارتىلاي رەسمي شەشىم ەكەندىگىن اتاي كەلە:

"بىرنەشە اي بۇرىن ماجارستاننىڭ رەسكە جانە تومپا قالالارىنداعى ترانزيتتىك ەكى ايماقتا بارلىعى 400-دەن استام ادام بار ەدى، الايدا قازىرگى ۋاقىتتا بۇل كورسەتكىش 200-دەن دە ازايىپ كەتتى. نەگىزىنەن ترانزيتتىك ايماقتار بۇدان دا كوپ بوسقىنداردى قابىلداۋعا قابىلەتتى. شامامەن 1,5 اي بۇرىن وسى ماسەلەگە قاتىستى جاساعان مالىمدەمەدە دە ماجارستان شەكارالارىن سىم تەمىرلەرمەن قورشاعاننان كەيىن ەل ىشىندە ۇستاعان ادامداردى سول سىم قورشاۋدىڭ ارعى بەتىنە، ياعني سەربياعا وتكىزىپ جىبەرگەنىن، ترانزيتتىك ايماقتاردا باسساۋعا سۇراۋشى بوسقىنداردىڭ وتىنىشتەرىنىڭ قابىلدانباي جاتقاندىعىن ايتقان ەدىك. ماجارستان بۇل قادامى ارقىلى بوسقىنداردىڭ باسساۋعا سۇراۋ مۇمكىندىكتەرىن تولىعىمەن جويدى" ، - دەدى.

"بىرنەشە ايلىق نارەستەلەر دە قاماۋدا"

بۇۇ-نىڭ بوسقىندار ءىسى جونىندەگى جوعارى كوميسسارى باسقارما وكىلدەرىنىڭ شەكاراداعى كونتەينەرلەردى كۇن سايىن ارالاپ، قاماۋعا الىنعان بوسقىندارمەن تىلدەسكەنىن، ءاربىر بوسقىننىڭ تىكەن سىممەن قورشالعان ايماقتا ايلار بويى قاماۋدا ۇستالۋلارىنىڭ اقىلعا قونىمسىز ەكەنىن ايتقان سيمون: "نەگىزىندە بوسقىندار ماجارستاندا باسساۋعا سۇراپ، ءوتىنىش جاساعاندىقتارى ءۇشىن جازالانۋدا. اسىرەسە، ءبىزدى الاڭداتاتىن ەڭ قيىن جاعداي 14 پەن 18 جاس ارالىعىنداعى، قامقورشىسى جوق بالالاردان بولەك، بىرنەشە عانا ايلىق نارەستەلەردىڭ دە قاماۋعا الىنۋى. ترانزيتتىك ايماقتا ومىرگە كەلگەن سابيلەر دە بار. اياعى اۋىر ايەلدەر بوسانعاننان كەيىن ءبىر-ەكى كۇننەن سوڭ سابيلەرىمەن بىرگە ترانزيتتىك ايماققا، تىكەن سىمدارمەن قورشالعان تەمىر كونتەينەرلەرگە كەرى قايتارىلادى. باسقا تۇگىلى، بالالاردىڭ بۇلاي تۇتقىندا ۇستالۋى كەشىرىلمەس كۇنا" ، - دەدى.

ەۋرووداقتىڭ نەگىزگى باس اۋرۋىنا اينالعان بوسقىندار ماسەلەسىن ودان سايىن قيىنداتقان ماجارستاننىڭ بۇل قىلىعى ەۋروكوميتەتتىڭ قىتىعىنا ابدەن ءتيىپ وتىرعانى انىق. نە دە بولسا، ەو-عا مۇشە ەل رەتىندە، بوسقىنداردى پانالاتۋعا مىندەتتى بولعانمەن، ولاردى كەرىسىنشە الاستاتىپ، ال قولدا قالعاندارىن بوپسالاپ جاتقانى كوكەيدە كوپ سۇراق تۋدىرۋدا.

“The Qazaq Times”