فوتو: راديو ازاتتىك

قىرعىزستان ەكس-پرەزيدەنتى المازبەك اتامباەۆتىڭ بيلىك باسىنداعى «سوتسيال-دەموكراتيالىق» پارتياسى قىتايدان قارجى العان.

«ازاتتىق» راديوسىنىڭ «اراي كوز چاراي» باعدارلاماسىندا جوعارى كەڭەس دەپۋتاتى رىسكەلدى مومبەكوۆ بيلىك باسىنداعى سوتسيال-دەموكراتتاردىڭ قىتاي كوممۋنيستىك پارتياسىنان 1 ميلليون سوم كولەمىندە قارجىلاي كومەك العاندىعىن ايتتى. ونىڭ سوزىنشە، قىرعىزستان سوتسيال-دەموكراتيالىق پارتياسى قىتاي كوممۋنيستىك پارتياسىنان بولەك، رەسەيدىڭ «ەدينايا روسسيا» جانە قازاقستاننىڭ «نۇر وتان» بيلىك پارتيالارىمەن دە جاقسى بايلانىس ورناتقان جانە قىتاي تاراپى بولگەن قارجى پارتيانىڭ ءماجىلىس زالى مەن تەحنيكالىق قۇرال-جابدىقتارىنا جۇمسالادى دەپ جوسپارلانۋدا.

سدپ توراعاسىنىڭ ورىنباسارى فاريد نيازوۆتىڭ ايتۋىنشا، قىتاي تاراپى سوتسيال-دەموكراتتارعا بىلتىرعى جىلدىڭ كۇزىندە كومەك كورسەتكەن. ونىڭ وزىندە قارجىلاي ەمەس تەحنيكالىق كومەك بەرگەن جانە ول كومەكتى سدپ ەمەس جوعارى كەڭەس العان. بىراق جوعارى كەڭەس ءباسپاسوز قىزمەتىنىڭ باسشىسى يبراگيم نۇراقىنۇلى فاريد نيازوۆتىڭ ءسوزىن جوققا شىعارعان. ول ءوز سوزىندە: «جوعارى كەڭەس قىتاي كوممۋنيستىك پارتياسىنان ەشقانداي كومەك العان جوق. جوعارى كەڭەس پارلامەنتتىك جۇيەنى قولدايتىن ۇيىمدارمەن عانا جۇمىس ىستەيدى. بىلتىر جوعارى كەڭەسكە قىتاي حالىق رەسپۋبليكاسىنىڭ قىرعىزستانداعى ەلشىلىگى 1 ميلليون سوم كولەمىندە كومەك كورسەتتى. كومەك قىتاي تاراپىنىڭ باستاماسى بويىنشا جاسالدى. ونىڭ وزىندە قارجىلاي كومەك ەمەس. ولار بىزگە تەحنيكالىق قۇرال-جابدىق الىپ بەردى» - دەگەن.

ايتا كەتەتىن ءبىر جايت، قىرعىزستان اتا زاڭىنداعى (1999 جىلى 12 ماۋسىم كۇنى قابىلدانعان) «ساياسي پارتيالار جونىندەگى» 16 باپ بويىنشا، ەل اۋماعىنداعى ساياسي پارتيالارعا شەتەلدىك پارتيالاردان، ۇيىمداردان، زاڭدى جانە جەكە تۇلعالاردان قانداي دا ءبىر قارجىلاي كومەك الۋعا تىيىم سالىنعان.

“The Qazaq Times”