فوتو: nasa.gov

قايدا بارساق تا، قىتاي ەكونوميكاسى مەن تەحنولوگياسى الدىمىزدان شىعاتىنى جاسىرىن ەمەس. بۇيىرىمىزدە وتىرعان حالىق ەندى عارىشتان "سوققى جاساماق". الەمدىك عارىش سالاسىنىڭ ماماندارى، ونىڭ ىشىندە قىتايلىقتاردىڭ ءوزى قىتايدىڭ 2011 جىلدىڭ قىركۇيەك ايىندا وربيتاعا ۇشىرعان "Tiangong-1"  اتتى عارىش كەمەسى 30 ناۋرىز بەن 3 ءساۋىر ارالىعىندا جەرگە قۇلايدى دەپ حابارلادى.  

وسىدان ەكى جىل بۇرىن، ياعني 2016 جىلى بەيجىڭ بيلىگى اتالعان عارىش كەمەسىنەن كوز جازىپ قالعانىن ايتىپ، بۇل تۋرالى بۇۇ-نا حابار بەرگەن ەدى. ماماندار ونىڭ جەرگە قاراي باعىت العانىن دا جاسىرمادى. ال "امەريكالىق عارىشتىق باقىلاۋ جەلىسى" اسا قاتتى جىلدامدىقپەن جەر بەتىنە قاراي قۇلديلاي باستاعان "Tiangong-1"-ءدىڭ 43 سولتۇستىك جانە 43 وڭتۇستىك ەندىك اراسىنداعى ايماققا قۇلاۋى مۇمكىن ەكەندىگىن ايتىپ، رەسمي مالىمدەمە جاسادى.

فوتو: theatlantic.com

اتالعان ەندىكتەردە ورنالاسقان ەلدەردىڭ اتى ازىرگە كوپشىلىككە اشىق ايتىلماسا دا،  بولجامدارىن جاساپ ۇلگەرگەن بىرقاتار ەلدەر ءوز قاۋىپسىزدىكتەرى ءۇشىن قاتتى الاڭداۋلى. دەگەنمەن، بەيجىڭ بيلىگى جەر شارىنا قۇلايتىن عارىش كەمەسىنىڭ قاۋىپتى ەمەس ەكەندىگىنە سەندىرۋگە تىرىسىپ، ونىڭ تىنىق مۇحيتقا قۇلاۋ ىقتيمالدىعى باسىم دەپ حابارلادى. جالپى، عارىش كەمەسى ناقتى قۇلايتىن جەردى تەك بىرنەشە كۇن بۇرىن انىقتاۋ مۇمكىن ەكەن. سونىمەن قاتار، ونىڭ ءبىراز بولىگى جەردىڭ اتموسفەرا قاباتىنا وتكەننەن كەيىن ءبىر-بىرىنەن اجىراپ، جانىپ كەتەدى دەپ كۇتىلۋدە.

8.5 توننالىق عارىش كەمەسى قۇلاعاننان كەيىن ونداعى حيميالىق ۋلى زاتتاردىڭ زيانى شاش-ەتەكتەن بولماق.

نەگىزى، بۇدان بۇرىن 1979 جىلى NASA, 1991 جىلى كەڭەستەر وداعىنىڭ باقىلاۋىنان شىعىپ قالعان عارىش كەمەلەرىنىڭ دە جەرگە قۇلاعانى بەلگىلى. "امەريكالىق عارىشتىق باقىلاۋ جەلىسى" كورسەتكەن ەندىكتە ورتا ازيا، ونىڭ ىشىندە قازاقستان وتە الىس. دەگەنمەن، قاي ەل، قاي جەردەگى حالىق بولسىن، بارىنەن اپات اۋلاق بولعاي!

“The Qazaq Times”