ناۋرىز – حالقىمىزدىڭ بار جاقسىلىقتىڭ باستاۋىنا بالاعان مەيرامى. ءدال وسى ءسات عارىشتان تارتىپ، جەتى قات جەردىڭ استىنا دەيىن جاڭالىققا ۇمتىلاتىن ۇلىستىڭ ۇلى كۇنى. ءمانى مەن ماڭىزى تەرەڭ اتاۋلى مەيرام. جەر-جەردە جارىقتىڭ جەتى رەڭىنە، دىبىستىڭ جەتى ىرعاعىنا، جەتى قات جەرگە، جەتى قات كوككە، جەتى كۇنگە بالاعان جەتى دامنەن كوجە جاساپ، جاراتۋشىدان شىن جاقسىلىقتى كۇتەتىن مەرەكەلىك ءسات.

وسى ورايدا «قازاق تايمس» اقپاراتتىق، قوعامدىق-ساياسي پورتالىنىڭ اتىنان التايدان اتىراۋعا دەيىنگى، ارقادان الاتاۋ مەن قاراتاۋعا دەيىنگى قازاق جۇرتىن، الەمدە وسى مەرەكەنى تويلايتىن بارلىق جۇرتقا – ۇلىس وڭ بولسىن، اق مول بولسىن دەيمىز! جاڭا جىل جاقسىلىعىن جەتكىزسىن، ەسكى جىل ەسىركەسىن! اسپان-جەردىڭ اراسى تىنىشتىق پەن باقىتقا تولى بولسىن! ءار قازاقتىڭ شاڭىراعى شاتتىققا، باقىتقا، داۋلەت پەن مول نەسىبەگە جەتە بەرسىن! ەلىمىز امان، جۇرتىمىز تىنىش بولىپ، جارىلقاۋشى جاراتقان نىعىمەتىن اياماسىن!

 “The Qazaq Times”