حيميالىق قارۋ قولدانۋ مەن تاراتۋعا قارسى سانكتسيا كۇشەيتىلدى. فوتو: alalam.ir.

ەۋروداققا مۇشە ەلدەردىڭ سىرتقى ىستەر مينيسترلىگىنىڭ وكىلدەرى قاتىسقان ەو سىرتقى قاتىناستار كەڭەسىنىڭ وتىرىسىندا جاڭا شەشىم قابىلداندى. اتالعان شەشىم حيميالىق قارۋدى قولدانۋ مەن تاراتۋعا قارسى كۇرەسكە باعىتتالعان. ناتيجەسىندە ءسۇريا ۇكىمەتىنىڭ حيميالىق قارۋ قولدانۋ ىسىنە قاتىسى بار دەلىنگەن 4 ادامدى سانكتسيا تىزىمىنە قوستى. بۇل تۋرالى "انادولى" اقپاراتتىق اگەنتتىگى حابارلادى. 

سانكتسيا تىزىمىنە قوسىلعان 4 ادامنىڭ بىرەۋى ءسۇريا رەجيمىندەگى ماڭىزدى اسكەري لاۋازىمدى. قالعان 3 تۇلعا حيميا سالاسىنىڭ بىلىكتى عالىمدارى. سانكتسيا تالابى بويىنشا ولاردىڭ مۇلىكتەرى، ەو ەلدەرىندەگى ساقتالعان ەسەپتەرى بۇعاتتالدى. ءارى ەو-عا مۇشە ەلدەرگە كەلىپ كەتۋگە تىيىم سالىنادى.

اتالعان 4 ادامدى قوسقاندا، سۇرياداعى حيميالىق قارۋ قولدانۋ ىسىنە بايلانىستى سانكتسيا تىزىمگە 261 جەكە تۇلعا، 67 ۇيىم تىركەلگەن. سانكتسيا ماۋسىمعا دەيىن كۇشىنە يە. دەگەنمەن، حيميالىق قارۋ قولدانۋ جالعاسسا سانكتسيا ۋاقىتى دا ۇزارا ءتۇسۋى مۇمكىن.

“The Qazaq Times”