دەپۋتات وقۋ قۇرالدارىنىڭ ەلەكتروندى فورماعا ءوتۋى بالالارعا زيان ەكەنىن ايتتى

ءبىلىم سالاسىن تسيفرلاندىرۋ الداعى ۋاقىتتا بالالارعا ارنالعان بارلىق وقۋلىقتار مەن كورنەكى قۇرالداردىڭ ەلەكتروندى فورماعا وتەتىنىن كورسەتەدى. الايدا بارلىق ەلەكتروندى قۇرالدار، نوۋتبۋكتەر، ينتەراكتيۆتى تاقتالار، پلانشەتتەر دەنساۋلىققا، اسىرەسە بالالار كوزىنە اسا زيان. بۇل تۋرالى بۇگىن قر پارلامەنت ءماجىلىسىنىڭ دەپۋتاتى قۇرالاي قارەكەن مالىمدەدى.

"ادامعا اسەر ەتەتىن فيزيكالىق فاكتورلارمەن جۇمىس تالاپتارىنىڭ سانيتارلى ەرەجەلەرى بويىنشا، بالالاردىڭ ونىمەن جۇمىس ىستەۋى  جاسىنا قاراي ەكى ساعاتتان ارتىق بولماۋ كەرەك. ول گيگيەنالىق تۇردە انىقتالعان. الايدا وقۋشىلاردىڭ كۇنىنە بەس ساباقتان كوپ وقيتىنىن جانە ولاردىڭ ونسىز دا گادجەتكە دەگەن قولجەتىمدىگىن ەسكەرسەك، ولاردىڭ ەلەكتروندى قۇرىلعىمەن وتكىزەتىن ۋاقىتى الدەقاشان نورمادان اسىپ كەتكەن", - دەدى ول.

دەپۋتاتتىڭ سوزىنشە، Microsoft باسشىسى بيلل گەيتستىڭ ءوزى بالالارىنىڭ 14 جاسقا دەيىن سمارتفون پايدالانۋىنا تىيىم سالعان.

"ارينە، مەكتەپتەردە ەلەكتروندى قۇرىلعىلاردىڭ پايدا بولعانى جاقسى. بىراق ەڭ باستىسى، سول گادجەتتىڭ بارلىق تۇرلەرى، وقۋشىلاردى بىلىمنەن الشاقتاتپاي، وعان تارتا بىلسە بولعانى. مىنە، وسىعان وراي ەلەكتروندى قۇرىلعىلارمەن جۇمىس ىستەۋ ۋاقىتىن رەتتەيتىن گيگيەنالىق نورمالاردى وزگەرتۋ جوسپارلانىپ وتىر ما؟", - دەدى قۇرالاي قاراكەن.

ال دەنساۋلىق ساقتاۋ ۆيتسە-ءمينيسترى الەكسەي تسوي بولسا، ەلەكتروندى قۇرىلعىلار وقۋشالىردىڭ جۇمىس ىستەۋ قابىلەتىنە جانە كوزىنە اۋىر بولاتىنى عىلىمي دالەلدەنگەنىن اتاپ ءوتتى.

"قازاقستاننىڭ دەنساۋلىق ساقتاۋ جۇيەسىندە ناقتى زەرتتەۋ جۇرگىزىلگەن جوق. پروفيلاكتيكا نەگىزىندە كوزگە جاتتىعۋ جاساۋ تاسىلدەرى بار. ءبىز مىندەتتى تۇردە جۇمىس توبىن قۇرىپ، زەرتتەۋ جۇرگىزەتىن بولامىز", - دەدى ۆيتسە-مينيستر.

الايدا تسويدىڭ بۇل سوزىنە ءماجىلىس توراعاسىنىڭ ورىنباسارى گۇلميرا يسيمباەۆا: "نەگىزى ءسىز ءبىلىم مينيسترلىگىن باسىپ وزۋىڭىز كەرەك. ءبىلىم مينيسترلىگى ەنگىزەيىن دەپ جاتىر، ال سىزدەر ونى ەندى عانا زەرتتەمەكسىزدەر. ءبارى اياقتالعان سوڭ عانا ونىڭ بالالار دەنساۋلىعىنا قالاي اسەر ەتكەنىن كورسەتپەكسىزدەر. سىزدەر الدىمەن مينيسترلىككە قالاي جانە نە ىستەۋ كەرەكتىگىن ايتۋلارىڭىز كەرەك. ەڭ باستىسى - ءبىز بالالارعا زيان كەلتىرمەۋىمىز كەرەك", - دەپ سىني پىكىر ءبىلدىردى.

ايتا كەتەيىك، بۇدان بۇرىن بعم باسشىسى  ەلەكتروندى وقىتۋ باعدارلاماسىنىڭ تولىق قولجەتىمدىگىن قامتاماسىز ەتەتىن تسيفرلاندىرۋ كونتسەپتسياسى ازىرلەنىپ جاتقانىن مالىمدەگەن ەدى.

“The Qazaq Times”