نازارباەۆ قايتادان قىتاي توراعاسى بولعان شي ءجينپيڭدى قۇتتىقتادى

"قىتاي ءسىزدىڭ باسشىلىعىڭىزبەن ورتاشا اۋقاتتى قوعام قۇرۋ جولىندا بۇدان دا بيىك شىڭداردى باعىندىراتىنىنا سەنىمدىمىن. كەلەشەكتە قازاقستان مەن قىتايدىڭ ءتۇرلى سالالارداعى ستراتەگيالىق ارىپتەستىگى قارقىندى دامي بەرەتىنىنە جانە حالىقتارىمىزدىڭ دوستىعى ودان ءارى نىعايا تۇسەتىنىنە ەش كۇمانىم جوق. وسىعان وراي ءوزارا سەنىم مەن تۇسىنىستىككە نەگىزدەلگەن ءبىزدىڭ جەكە دوستىعىمىزدىڭ ماڭىزى ەرەكشە. ارامىزداعى قارىم-قاتىناستارىمىز بەن بىرلەسكەن جۇمىسىمىز كەلەشەكتە استانا مەن بەيجىڭنىڭ جەمىستى ىنتىماقتاستىعىنىڭ بەرىك تىرەگى بولاتىنىنا كامىل سەنەمىن", – اقوردا سايتىندا جاريالانعان جەدەلحات ماتىنىندە.

نۇرسۇلتان نازارباەۆ شي جينپيڭگە زور دەنساۋلىق، باق-بەرەكە تىلەپ، دوستاس قىتاي حالقىنىڭ وركەندەۋى مەن دامۋىنا نيەتتەستىك ءبىلدىردى.

ايتا كەتەيىك، شي بيلىككە كەلگەننەن كەيىن قىتايدا ەكونوميكالىق رەفورما جانە جەمقورلىققا قارسى قاتاڭ سوققى بەرۋ قولعا الىندى. دەگەنمەن، رەفورمالار مەن كۇرەستەر بارىسىندا ۇلتشىلدىق ءوسىپ، جەكەلەگەن ازاماتتاردىڭ قۇقىقتارىنىڭ بۇزىلۋى كوپتەپ تۋدى. بۇلاردىڭ اراسىندا قىتاي قازاقتارى دا بار. ال قازاقستان پرەزيدەنتى بولسا، وسىنداي قۇتتىقتاۋدان كەيىن قىسىم كورگەن قازاقتاردىڭ ماسەلەسىن شەشۋگە تىرىسۋى دا مۇمكىن.

“The Qazaq Times”