Şi Jinpiñ, Qıtay Halıq Respublikasınıñ Törağası. Foto: Reuters
Nwrswltan Nazarbaev Qıtay Halıq Respublikasınıñ törağası qızmetine qayta tağayındalğan Şi Jinpiñge qwttıqtau jedelhatın joldadı, dep habarlaydı Aqordanıñ resmi saytı. 

"Qıtay Sizdiñ basşılığıñızben ortaşa auqattı qoğam qwru jolında bwdan da biik şıñdardı bağındıratınına senimdimin. Keleşekte Qazaqstan men Qıtaydıñ türli salalardağı strategiyalıq äriptestigi qarqındı dami beretinine jäne halıqtarımızdıñ dostığı odan äri nığaya tüsetinine eş kümänim joq. Osığan oray özara senim men tüsinistikke negizdelgen bizdiñ jeke dostığımızdıñ mañızı erekşe. Aramızdağı qarım-qatınastarımız ben birlesken jwmısımız keleşekte Astana men Beyjiñniñ jemisti ıntımaqtastığınıñ berik tiregi bolatınına kämil senemin", – Aqorda saytında jariyalanğan jedelhat mätininde.

Nwrswltan Nazarbaev Şi Jinpiñge zor densaulıq, baq-bereke tilep, dostas Qıtay halqınıñ örkendeui men damuına niettestik bildirdi.

Ayta keteyik, Şi bilikke kelgennen keyin Qıtayda ekonomikalıq reforma jäne jemqorlıqqa qarsı qatañ soqqı beru qolğa alındı. Degenmen, reformalar men kürester barısında wltşıldıq ösip, jekelegen azamattardıñ qwqıqtarınıñ bwzıluı köptep tudı. Bwlardıñ arasında qıtay qazaqtarı da bar. Al Qazaqstan prezidenti bolsa, osınday qwttıqtaudan keyin qısım körgen qazaqtardıñ mäselesin şeşuge tırısuı da mümkin.

“The Qazaq Times”