فوتو: راديو ازاتتىك

تۇركىمەنستان پرەزيدەنتىنىڭ ۇلى كەزەكتى رەت پارلامەنت سايلاۋىنا قاتىسادى– دەپ حابارلايدى ca-portal اقپارات كوزى.

جەرگىلىكتى باق وكىلدەرىنىڭ مالىمەتىنشە، قۇربانعۇلى بەردىمۇحامەدوۆتىڭ ۇلى سەردار بەردىمۇحامەدوۆ 25 ناۋرىز كۇنى وتەتىن پارلامەنت سايلاۋىنا قاتىسادى. ول احال وبلىسىنا قاراستى №25 «دۋشاك» سايلاۋ وكرۋگىنىڭ اتىنان سايلاۋعا تۇسپەك. سەرداردىڭ قارسىلاسى كاكا قالاسىنىڭ  تۇرعىنى، مەكتەپ ديرەكتورىنىڭ ورىنباسارى وگۇلجەرەن گۇردوۆا بولماق.

الدا كەلە جاتقان پارلامەنت سايلاۋىنا تۇركىمەنستان تاريحىندا تۇڭعىش رەت ءۇش پارتيا قاتىسپاق. بۇل جولعى سايلاۋعا بەردىمۇحامەدوۆتىڭ «دەموكراتيالىق» پارتياسىنان بولەك، «اگرارلار» پارتياسى مەن «ونەركاسىپشىلەر جانە كاسىپكەرلەر» پارتياسى تۇسپەك. بىراق سوڭعى ەكەۋى "ساياسي قۋىرشاق" ءرولىن اتقارماق.

سەردار بەردىمۇحامەدوۆ. فوتو: راديو ازاتتىك.

قازىرگى تاڭدا 36 جاستاعى سەردار بەردىمۇحامەدوۆ پارلامەنت نورمالارى جانە زاڭ كوميتەتىنىڭ باسشىسى قىزمەتىمەن قاتار تۇركىمەنستان دەموكراتيالىق پارتياسىنىڭ دەپۋتاتى قىزمەتىن دە اتقارۋدا. ونى مەملەكەتتىك باق وكىلدەرى «حالىقتىڭ ۇلى» دەپ اتايدى. سەردار جونىندە بۇعان دەيىن ەشقانداي اقپارات بولماعان. بىراق سوڭعى جىلدارى ونىڭ ەلدەگى ساياسي بەلسەندىلىگى ارتقان. ول 2017 جىلى تۇركىمەنستان اتىنان بىرنەشە رەت رەسەي فەدەراتسياسىنا رەسمي ءىس-ساپارمەن بارعان. ءدال وسى جىلى سەرداردى قۇربانعۇلى بەردىمۇحامەدوۆ اكەسى «مالىكعۇلى بەردىمۇحامەدوۆ» اتىنداعى «وتان الدىنداعى ەڭبەگى ءۇشىن» وردەنىمەن ماراپاتتاعان. شەتەلدىك ساراپشىلاردىڭ سوزىنشە، قۇربانعۇلى بەردىمۇحامەدوۆ ۇلى سەردار بەردىمۇحامەدوۆتى ءوزىنىڭ مۇراگەرى ەتپەك.

“The Qazaq Times”