فوتو: shell.lv

بريتان-نيدەرلاندىق Shell كومپانياسى "قازمۇنايگاز" ۇلتتىق كومپانياسى 2019 جىلى  IPO-عا شىققانعا دەيىن ونىڭ ۇلەسىن ساتىپ الۋ مۇمكىندىگىن قاراستىرىپ جاتىر. بۇل تۋرالى Bloomberg اگەنتتىگى حابارلاعان. 

امەريكالىق باق مالىمەتىنشە، 2019 جىلعا جوسپارلانىپ وتىرعان ءىرو-عا شىقپاس بۇرىن ءوزىنىڭ باعاسىن ارتتىرۋ ماقساتىندا Shell كومپانياسىنا قمگ ءوز ۇلەسىن ۇسىنعان. Shell ۇسىنىستى قاراۋعا كەلىسىم بەرگەن.

باسىلىم مالىمەتىنشە، قمگ مەن "سامۇرىق-قازىنا" ۇلتتىق ءال-اۋقات قورى بۇل حابارعا قاتىستى اقپارات بەرۋدەن باس تارتقان. ال Shell كومپانياسى بولسا پورتفەل قۇرۋ بويىنشا مۇمكىندىكتەردى قاراستىرىپ جاتقانىن، الايدا كوممەرتسيالىق قۇپيا بولعاندىقتان پورتفەلدى باسقارۋ قىزمەتى بويىنشا تۇسىنىكتەمە بەرىلمەيتىنىن مالىمدەگەن.

Shell – ەنەرگەتيكالىق جانە مۇناي-حيميا كومپانيالارىن بىرىكتىرەتىن حالىقارالىق كونتسەرن، شتاب-پاتەرى نيدەرلاند، گااگا قالاسىندا ورنالاسقان. قازىرگى ۋاقىتتا Shell قازاقستاننىڭ ەكونوميكاسىنا ينۆەستيتسيا سالاتىن ەڭ ءىرى شەتەل ينۆەستورلارىنىڭ ءبىرى. Shell كونتسەرنى ءتورت جوباعا قاتىسادى. بۇل – سولتۇستىك كاسپي بويىنشا ءونىمدى ءبولۋ تۋرالى كەلىسىم (قاتىسۋ ۇلەسى 16.81%), كاسپي تەڭىزىنىڭ قازاقستاندىق سەكتورىنداعى «جەمچۋجينا» ليتسەنزيالىق ۋچاسكەسىن يگەرۋ بويىنشا ءبولۋ تۋرالى كەلىسىم (قاتىسۋ ۇلەسى 55%), قاراشىعاناق كەن ورنى ءونىمىن ءبولۋ تۋرالى ناقتى كەلىسىم («بي دجي گرۋپپ» ارقىلى قاتىسۋ ۇلەسى 29.25%) جانە قازاقستاندىق مۇنايدى الەمدىك نارىقتارعا جەتكىزەتىن كاسپي قۇبىر كونسورتسيۋمى (قاتىسۋ ۇلەسى 7.4%).

"قازمۇنايگاز" - قازاقستاننىڭ مۇناي-گاز سالاسىندا مەملەكەت مۇددەسىن بىلدىرەتىن، كومىرسۋتەكتى بارلاۋ، ءوندىرۋ، وڭدەۋ جانە تاسىمالداۋ جونىندەگى وپەراتور. كومپانيا اكتسياسىنىڭ 90 پايىزى "سامۇرىق-قازىنا" قورىنا، 10 پايىزى ۇلتتىق بانككە تيەسىلى.

“The Qazaq Times”