تۇرىك سەريالدارىنا تىيىم سالعان ەل

"The National" اتتى اعىلشىن باسىلىمىنىڭ حابارلاۋىنشا، اراب تىلىندە حابار تاراتاتىن، الەمنىڭ ەڭ تانىمال مەدياتوپتارىنىڭ ءبىرى ەم-بي-سي وزىنە قاراستى تەلەارنالاردىڭ بارلىعىنا تۇرىك سەريالدارىن كورسەتۋگە تىيىم سالدى.

اتالعان مەدياورتالىقتىڭ قاراماعىندا 11 تەلەارنا جۇمىس ىستەيدى جانە ولاردىڭ بارلىعى دا بۇگىنگە دەيىن ءوز كورەرمەندەرىنە تۇرىكتىڭ ءتۇرلى تەلەكيحايالارىن جۇيەلى تۇردە ۇسىنىپ كەلگەن.

اتالعان باسىلىمنىڭ جازۋىنشا "اياق-استىنان" شىعارىلعان بۇل شەشىمنىڭ ناقتى سەبەبى ەش جەردە اشىپ ايتىلماعان.

ال ەم-بي-سي مەديا توبىنىڭ ءباسپاسوز حاتشىسى مازەن حايەك وسى شەشىمنىڭ دۇرىستىعىن راستاپ: "ەم-بي-سي" مەديا وبىنان بولەك، بىرقاتار اراب ەلدەرىندە بۇدان بىلاي تۇرىك سەريالدارىنىڭ كورسەتىلۋىنە تىيىم سالدىق. ءبىز بۇل شەشىمدى ابدەن ويلانىپ، 2 ناۋرىز كۇنى قابىلدادىق", - دەپ مالىمدەمە جاساعان. الايدا نەلىكتەن تۇرىك حالقىنىڭ سەريالدارىنان باس تارتىپ وتىرعانى تۋرالى ءتىس جارمادى.

ول ءبىر سوزىندە "تۇركيا تەلەونىمدەرىنەن باس تارتۋىمىزدىڭ استارىندا اراب سەريالدارىن ساپالى ەتىپ ۇسىنۋدىڭ تىڭ ءادىسى بار", - دەپ، نەگىزگى ويىن دا جاسىرمادى.

وسى ورايدا، تەلەجاشىك ارقىلى ءۇندى، كارىس جانە تۇرىك ۇلتتارىنىڭ تەلەحيكايالارىنا تەلمىرىپ، ولاردىڭ كەيىپكەرلەرىنەن ءوز قاھارماندارىن جاساپ جۇرگەن كورەرمەندەرىمىزدى سول كەرەعار ۇدەرىستەن قۇتقارۋدىڭ وسى ءبىر تىڭ ءادىسىن ءبىز دە وزىمىزگە ۇلگى ەتسەك قۇبا-قۇپ بولار ەدى...

“The Qazaq Times”