وڭتۇستىك كورەيادا جۇمىس ۋاقىتى قىسقاردى

وڭتۇستىك كورەيا (ازيانىڭ ەڭ كوپ جۇمىس ىستەيتىن حالىقتارىنىڭ ءبىرى) ءومىر ساپاسىن ارتتىرۋ ماقساتىندا قالىپتى جۇمىس ساعاتىن قىسقارتۋ تۋرالى زاڭ جوباسىن قىبالدادى، - دەپ مالىمدەدى The Guardian باسپاسى.

وڭتۇستىك كورەيانىڭ ۇلتتىق اسسامبلەياسى كوپشىلىك داۋىسپەن اپتالىق 68 ساعات جۇمىس ۋاقىتىن 52-گە قىسقارتتى. زاڭ شىلدە ايىندا كۇشىنە ەنەدى دە، ءبىرىنشى كەزەكتە ۇلكەن كومپانيالاردا سودان كەيىن كىشى كاسىپورىنداردا قولدانىلادى.

زاڭعا كاسىپكەرلەر قارسىلىق تانىتقانىمەن، حالىقتىڭ ءومىر ساپاسىن كوتەرىپ، قوسىمشا جۇمىس ورىندارىن اشۋ جانە ونىمدىلىك دەڭگەيىن ارتتىرۋ ماقساتىندا بۇل دۇرىس شەشىم ەكەنى انىقتالدى. سونىمەن قاتار ەلدەگى تۋ دەڭگەيىنىڭ ارتۋىنا دا بۇل شەشىم ىقپال ەتەدى دەگەن بولجام بار (وتكەن جىلى ەلدەگى تۋ دەڭگەيى رەكوردتى مينيمالدى دەڭگەيگە جەتتى).

وڭتۇستىك كورەيانىڭ ەكونوميكاسى 80-90 جىلدارى شارىقتاپ دامىپ، ەلدە "تىنباي جۇمىس ىستەيتىندەر" مادەنيەتى قالىپتاستى. گەندەرلىك تەڭدىك پەن وتباسى ءمينيسترى چۋڭ حيۋن (Chung Hyun) ەلدەگى جۇمىس ۋاقىتىن "ادام شىدامايتىنداي ۇزاق" دەپ سيپاتتاعان بولاتىن.

وڭتۇستىك كورەيا حالقى ەكونوميكالىق ىنتىماقتاستىق جانە دامۋ ۇيىمى قۇرامىنداعى ەلدەر اراسىندا ەڭ كوپ جۇمىس ىستەيتىن ەلدەردىڭ ءبىرى سانالادى (مەكسيكادان عانا قالىپ تۇر).

وڭتۇستىك كورەيادا حالىق اۋستراليا، ۇلىبريتانيا سياقتى ەلدەرمەن سالىستىرعاندا (ورتاشا تابىس دەڭگەيى جاقىن ەلدەر) جىلىنا 400 ساعاتقا ارتىق جۇمىس ىستەيدى.

ال جاڭا زاڭ جوباسى اپتالىق جۇمىس ساعاتىن 40 ساعات ەتۋدى جانە قوسىمشا 12 ساعات قوسۋدى ۇسىنادى. كورەيانىڭ ەكونوميكالىق زەرتتەۋلەر ينستيتۋتىنىڭ مالىمەتىنشە، جۇمىس ۋاقىتىنىڭ قىسقارۋى كاسىپورىنداردى جىلىنا 12 ترلن ۆون (11 ملرد دوللار) شىعىنعا الىپ كەلۋى مۇمكىن.

18-گە تولماعان ادامدار اپتاسىنا 35 ساعات جۇمىس ىستەۋگە قۇقىلى.

“The Qazaq Times”