"شەشۋشى داۋىل" وپەراتسياسىنداعى ساۋد ارمياسى. فوتو: dawnnews.tv.

يران سىرتقى ىستەر ءمينيسترى باحرام كاسيمي ءبىر كۇن بۇرىن جاساعان مالىمدەمەسىندە «قازىرگى يەمەندەگى سوعىستىڭ باستى سەبەبى - اقش پەن ۇلىبريتانيانىڭ ساۋد ارابياسىنا قارۋ-جاراق ساتۋى» دەپ كورسەتتى. بۇل تۋرالى يران باق-ىنا سىلتەمە بەرە وتىرىپ، People باسىلىمى حابارلادى. 

ول يراننىڭ اقپارات قۇرالدارىنا بەرگەن سۇحباتىندا: «يران تارابى ساۋد ارابياسىنان يەمەنگە جاسالعان اگرەسسياسىن توقتاتادى دەپ ۇمىتتەنەدى. ساۋد ارابياسىن اگرەسسياعا يتەرمەلەگەن اقش پەن ۇلىبريتانيانىڭ قاۋر-جاراق ساتىپ بەرۋى»، – دەدى.

اقش پەن ۇلىبريتانيا يراندى يەمەندەگى حۋسيتتەرگە قارۋ-قاراق جەتكىزىپ بەردى دەپ قارايدى. اقش تارابى وتكەن ايدا بۇۇ-دا جاساعان مالىمدەمەسىندە حۋسيت كۇشتەرىنىڭ ساۋد ارابياسىنىڭ ورتالىق قالاسىنا قارسى زىمىران شابۋىلىن جاساعانىن ايتقان. الايدا بۇل زىمىراندى ساۋد ارابياسىنىڭ اۋە قورعانىس جۇيەسى اتىپ ءتۇسىردى. ولار تەكسەرۋ ناتيجەسىندە زىمىراننىڭ يراندا جاسالعانىن ايتقان.

الايدا، بۇنى تەھران (تەگەران) بيلىگى مويىندامادى. ولار بۇنى اقش پەن ساۋد ارابياسىنىڭ يسلام رەسپۋبليكاسىنا جاپقان جالاسى دەپ ايىپتاعان.

وسىدان كەيىن ۇلىبريتانيا بۇۇ قاۋىپسىزدىك كەڭەسىنەن يرانعا قارسى شارا قولدانۋدى تالاپ ەتىپ، العاشقى ادىمداعى جوبالاردى دايىنداۋعا كىرىسكەن. بىراق وعان قاۋىپسىزدىك كەڭەستەگى تۇراقتى مۇشەنىڭ ءبىرى رەسەي قارسى شىعىپ، اقش تارابىنىڭ كورسەتكەن دالەلدەرى جالعان دەدى.

بۇل قارارعا پىكىر بىلدىرگەن يران ءسىم باسشىسى سوزىندە: «بۇل قادامدار يەمەندەگى جاعدايدى جاقسارتۋعا ەش كومەكتەسپەيدى. بۇل ۇلىبريتانيانىڭ جاۋلاۋشىلارعا قولايلى ەتىپ دايىنداعان حالىقارالىق شاراسى»، – دەپ سىنعا الدى.

ەسكە سالا كەتەيىك، 2014 جىلى قىركۇيەك ايىندا يەمەندەگى حۋسيت كۇشتەرى ەل استاناسى سانيانى باسىپ الدى جانە ەلدىڭ وڭتۇستىك وڭىرلەرىن باقىلاۋىنا الدى. يەمەن پرەزيدەنتى ساياسي باسپانا سۇراپ ساۋد ارابياسىنا بارۋعا ءماجبۇر بولدى. 2015 جىلى ناۋرىز ايىندا ساۋد ارابياسى مەن ءباا يەمەن حۋسيتتەرىنە قارسى «شەشۋشى داۋىل» اتتى اسكەري ءىس-قيمىلىن باستاپ، يەمەن جەرىنە سوعىس اشقان بولاتىن.

“The Qazaq Times”