ەۋروۇشتىك يرانعا ەسكەرتۋ جاسادى

جاقىندا عانا ساۋد ارابياسىنا جاسالعان شابۋىلدىڭ ارتىندا يران باسشىلارىنىڭ تۇرعانى – ايقىن فاكت. Politico باسىلىمىنىڭ مالىمەتىنشە، بريتانيا پرەمەر-ءمينيسترى بوريس دجونسون، فرانتسۋز پرەزيدەنتى ەممانۋەل ماكرون جانە گەرمانيا كانتسلەرى انگەلا مەركەل باس اسسامبلەيا سەسسياسىنا وراي وتكەن وتىرىستا وسىنداي قورىتىندىعا كەلگەن.

«ءبىز، فرانتسيا، گەرمانيا جانە بىرىككەن كورولدىكتىڭ كوشباسشىلارى، اسىرەسە تاياۋ شىعىستاعى قاۋىپسىزدىك پەن تۇراقتىلىقتىڭ جاھاندىق رەجيمىن ساقتاۋ جولىندا مۇددەلەرىمىز ورتاق ەكەنىن ايتامىز. بۇل شابۋىلعا يران جاۋاپتى ەكەنى بىزگە انىق. شىندىق، فاكت وسى»، – دەدى تاراپتار.

ەۋروۇشتىكتىڭ ويىنشا، بۇل شابۋىلدار ساۋد ارابياسىنا قارسى باعىتتالعان. دەگەنمەن، شابۋىل سالدارى بارلىق ەلدەرگە كەرى اسەر ەتىپ، ءىرى قاقتىعىستىڭ تۋىنداۋ قاۋپىن ارتتىرادى. ماكرون سوزىندە يەمەندە جالعاسىپ جاتقان قاقتىعىستاردىڭ الدىن الىپ، ايماقتىق تۇراقتىلىق پەن قاۋىپسىزدىكتى قامتاماسىز ەتۋ بويىنشا ۇجىمدىق كۇش-جىگەر قاجەت ەكەندىگىن ەسكە سالدى.

يادرولىق كەلىسىمدەگى تالاپتاردىڭ ورىندالۋىن تالاپ ەتكەن ەۋروپا ەلدەرى، اتالعان كەلىسىم شەڭبەرىندە يراندى ماگاتە-مەن تولىق كولەمدە ىنتىماقتاسۋعا شاقىردى. وسىعان دەيىن بريتانيا پرەمەرى بوريس دجونسون «Sky News» تەلەارناسىنا بەرگەن سۇحباتىندا «يران ءبىزدىڭ تاراپتارمەن جاڭا كەلىسىم جاسايتىن ۋاقىتقا كەلدى» دەپ مالىمدەگەن.

ساۋد ارابياسىندا ورىن العان جارىلىسقا يراننىڭ تىكەلەي قاتىسى بارىن بىرنەشە مارتە قايتالاعان ەۋروپا كوشباسشىلارى تەھراننان داعدارىس جاساپ، قاقتىعىس تۋعىزباۋدى تالاپ ەتتى. «ءبىز تاياۋ شىعىستاعى شيەلەنىستىڭ دەەسكالاتسياسىنا، بيارريتستە وتكەن ۇلكەن جەتىلىك سامميتىندە قابىلدانعان مالىمدەمەلەر اياسىندا حالىقارالىق بەيبىتشىلىك پەن قاۋىپسىزدىكتى ساقتاۋعا مۇددەلى سەرىكتەستەرمەن ديالوگ ءۇشىن جاعداي جاساپ، ديپلوماتيالىق بايلانىستاردى جالعاستىرۋعا نيەتتىمىز. ءبىز يراندى وسىنداي ديالوگ ورناتۋعا جانە ارانداتۋشىلىق پەن ەسكالاتسيادان اۋلاق بولۋعا شاقىرامىز»، – دەدى گەرمانيا كانتسلەرى انگەلا مەركەل.

"The Qazaq Times"