قىتاي باسشىسى: حالىقارالىق جاعداي قالاي وزگەرسە دە يرانمەن قاتىناستى ساقتايمىز

قىتاي باسشىسى شي جينپيڭ مالىمدەمە جاساپ، حالىقارالىق جانە وڭىرلىك جاعداي قالاي وزگەرسە دە، يرانمەن جان-جاقتى ستراتەگيالىق  قاتىناسىن وزگەرتپەيتىنىن ءبىلدىردى. قىتاي باسشىسى بۇل پىكىرىن كەشە بەيجىڭگە ساپارلاي بارعان يران پارلامەنت توراعاسى ءالي ارداشير لاريجانيدى قابىلداعان كەزدە ورتاعا سالدى.

قىتاي باسشىسى لاريجانيگە قىتاي مەن يراننىڭ ستراتەگيالىق ءوزارا سەنىمدى نىعايتۋى كەرەكتىگىن، نەگىزگى مۇددە جانە ۇستانىمدار ماسەلەسىندە ءبىر-ءبىرىن قولداۋ كەرەكتىگىن ايتقان.

قىتاي باسشىسى شي جينپيڭ بەيجىڭدە يران پارلامەنت توراعاسىمەن كەزدەسىپ جاتقاندا، ساۋد ارابيانىڭ مۇراگەر حانزاداسى مۇحاممەد بين سالمان دا بەيجىڭگە ساپارلاي باردى. ساۋد حانزاداسى دا بۇگىنگە قىتاي باسشىسىمەن كەزدەسۋدى جوسپارلاعان.

يران يسلام رەسپۋبليكاسى مەن ساۋد ارابياسى كوپ جىلداردان بەرى ءبىر-بىرىنە قاراما-قارسى پوزيتسيا ۇستانىپ كەلگەن جانە يەمەن سەكىلدى ەلدەردە ءبىر-بىرىنە قارسى سوعىسىپ جاتقان ەلدەر. «رەيتەر» اگەنتتىگىنىڭ ايتۋىنشا، قىتاي ورتا شىعىستىڭ مۇنايىنا مۇددەلى بولعانىمەن، بەيجىڭ بيلىگى ءداستۇرلى تۇردە بۇل ايماقتاعى داۋ-دامايدان باسىن اۋلاق ۇستاپ كەلگەن. سوندىقتان دا جانجالداردى شەشۋگە دە ءرولى تىم تومەن بولعان. الايدا، سوڭعى جىلدارى قىتاي بيلىگى اراب-پارسى الەمىندەگى ءوزىنىڭ ىقپالىن ارتتىرۋعا بارىنشا كۇش سالۋدا.

سونداي-اق، قىتاي يرانمەن يادرولىق كەلىسىمگە قول قويعان التى ءىرى ەلدىڭ ءبىرى. ترامپ اقش پرەزيدەنتى بولىپ كەلگەننەن كەيىن يرانمەن جاساسقان كەلىسىمنەن باس تارتتى جانە سانكتسيالاردى قايتا قالپىنا كەلتىردى. قىتايمەن دە ساۋدا سوعىسى، كەزەكتەسكەن تاريفتىك قىسىمدارعا باردى. بۇل قىتاي مەن يراندى ستراتەگيالىق سەنىمدى نىعايتۋعا ىنتالاندىردى.

“The Qazaq Times”