فوتو: DW.

يراكتا «يسلام مەملەكەتى» تەررورلىق ۇيىمىنا قاتىسى بار 15 تۇركيالىق ايەل ءولىم جازاسىنا كەسىلدى – دەپ حابارلايدى نەمىس تولقىنى اقپارات اگەنتتىگى.

اگەنتتىك مالىمەتىنشە، باعدات قالاسىنىڭ سوتى 25 اقپان كۇنى «يسلام مەملەكەتى» تەررورلىق ۇيىمىنا قاتىسى بار 15 تۇركيالىق ايەلدى ءولىم جازاسىنا كەسىپ، بىرەۋىن ءومىر بويى باس بوستاندىعىنان ايىرعان. تەرگەۋ جۇمىستارى بارىسىندا 20 مەن 50 جاس اراسىنداعى ايەلدەردىڭ «يسلام مەملەكەتى» لاڭكەستىك ۇيىمىنىڭ قاتارىنا كۇيەۋلەرىمەن بىرگە ەرىپ كەلگەندىگى انىقتالعان. ۇستالعان 16 ايەل وسى ۋاقىتقا دەيىن «يسلام مەملەكەتى» تەررورلىق ۇيىمىنىڭ سودىرلارىنا لاڭكەستىك شابۋىلدار جاساۋعا كومەكتەسىپ كەلگەن.

يراك قۇقىق قورعاۋ ورگاندارى وسى ۋاقىتقا دەيىن ەل اۋماعىنان تەررورلىق ۇيىمدارعا قاتىسى بار وزگە ەلدەردەن كەلگەن 509 ايەل مەن 813 بالانى ۇستاعان. تەكسەرۋ بارىسىندا ولاردىڭ 300-گە جۋىعى تۇركيالىق ايەلدەر مەن بالالار ەكەندىگى انىقتالعان.

“The Qazaq Times”