فيليپپيندە ەسىرتكىمەن كۇرەس سالدارىنان مىڭداعان ادام كوز جۇمدى

فيليپپين پرەزيدەنتى رودريگو دۋتەرتەنىڭ (Rodrigo Duterte) مىڭداعان ادامنىڭ ولىمىنە الىپ كەلگەن ەسىرتكىمەن كۇرەس ساياساتىنا جانە كونستيتۋتسياعا ەنگەن وزگەرىستەرگە نارازىلىعىن بىلدىرگەن حالىق مانيلا كوشەلەرىنە ەرەۋىلگە شىقتى، - دەپ حابارلايدى Al Jazeera اقپارات اگەنتتىگى. 

مانيلانىڭ كاردينالى لۋيس انتونيو تاگل (Luis Antonio Tagle): "الدا قانداي قيىندىق كۇتىپ تۇرعانىنا قاراماستان، ءوز پىكىرىمىزدى ءبىلدىرىپ، ۇكىمەت ءبىزدى تىڭداعانعا دەيىن ەرەۋىلگە شىعا بەرەمىز", - دەدى.

2016 جىلى بيلىك باسىنا دۋتەرتە كەلگەننەن باستاپ ونىڭ ەسىرتكىمەن كۇرەس ساياساتىنا كاتوليك شىركەۋى بارىنشا قارسىلىق تانىتىپ كەلەدى. سەبەبى ءفيليپپيننىڭ 101 ملن حالقىنىڭ 80%-عا جۋىعى كاتوليكتەر.

وپپوزيتسيالىق سەناتوردىڭ ايتۋىنشا، ەسىرتكىمەن كۇرەستىڭ باستالعانىنا 20 اي عانا وتسە دە، قايتىس بولعانداردىڭ سانى 20 مىڭنان اسىپ ۇلگەردى.   ۇكىمەت بولسا، 2016 جىلدىڭ 1 شىلدەسى مەن 2017 جىلدىڭ 27 قاراشاسى اراسىندا قايتىس بولعاندار سانى 3967 دەپ كورسەتكەن.

دۋتەرتەنى "Human Rights Watch" سەكىلدى ادام قۇقىقتارىن قورعايتىن توپتار "ەسىرتكى قىلمىسىنا قاتىسى بار، ەسىرتكىگە تاۋەلدى بالالار مەن ەرەسەكتەردى ءىس قوزعاماي ولتىرگەنى ءۇشىن" ايىپتاعان بولاتىن.

مانيلانىڭ ەپيسكوپى برودەريك پابيلو (Broderick Pabillo): "ماسەلە ساندا ەمەس، ويتكەنى ساياسات ءالى جۇرگىزىلىپ جاتىر. قازىر بىرنارسە وزگەرتپەسەك، ادام ءولىمى كوبەيە بەرەدى", - دەدى.

فوتو: aljazeera.com

ال مانيلانىڭ باسقا ايماعىندا سەنبى كۇنى تۇستەن كەيىن سول قاناتتاعى وداق وكىلدەرى، ستۋدەنتتەر، شىركەۋ قىزمەتكەرلەرى مەن قوعام بەلسەندىلەرى "ديكتاتور دۋتەرتەگە قارسى" ەرەۋىلگە شىقتى.

پرەزيدەنتتىڭ ءباسپاسوز قىزمەتىنىڭ وكىلى گارري روك (Harry Roque): "جەرگىلىكتى حالىقتىڭ اشىق ەرەۋىلگە شىعۋى فيليپپيندە دەموكراتيا مەن ءسوز بوستاندىعىنا ەشكىم كەدەرگى كەلتىرمەيتىنىن كورسەتەدى", - دەدى.

ال پوليتسيا قىزمەتكەرلەرى، ولاردىڭ جانۇيالارى مەن قولداۋشىلارى بولسا، كەرىسىنشە، مانيلانىڭ پوليتسيا بولىمشەسى ماڭىندا دۋتەرتەنىڭ ەسىرتكىمەن كۇرەس ساياساتىن قولدايتىندارىن ءبىلدىردى.

“The Qazaq Times”