فوتو: ca-news.

قىتاي-قىرعىزستان-وزبەكستان باعىتىنداعى تاس جول وسى ايدىڭ ىشىندە ىسكە قوسىلادى – دەپ حابارلايدى ca-news اقپارات اگەنتتىگى.

اقپان ايىنىڭ 23-ءى كۇنى قىتاي سىرتقى ىستەر مينيسترلىگىنىڭ ارنايى وكىلى گەن شۋان ءباسپاسوز ءماسليحاتىندا قىتاي-قىرعىزستان-وزبەكستان باعىتىنداعى تاس جول جونىندە مالىمدەمە جاساعان. وندا ول: «ءبىز 2017 جىلدىڭ قازان ايىنىڭ 30-ى مەن قاراشا ايىنىڭ 1-ءى كۇندەرى ارالىعىندا تاشكەنت – ءاندىجان – وش – يركەشتام – قاشقار باعىتىنداعى تاس جولدى سىناقتان وتكىزدىك. سىناق وڭ ناتيجە كورسەتۋىنە بايلانىستى تاس جولدى وسى ايدىڭ ىشىندە ىسكە قوسۋدى جوسپارلاپ وتىرمىز» - دەگەن.

ەستەرىڭىزگە سالايىق، بۇدان بولەك قىتاي، قىرعىزستان جانە وزبەكستان تاشكەنت – ءاندىجان – وش – يركەشتام – قاشقار باعىتىندا تەمىر جول سالۋدى جوسپارلاپ وتىر. ەگەر اتالمىش تەمىر جول ىسكە قوسىلاتىن بولسا، وندا ول قازاقستان ارقىلى وتەتىن دوستىق – الاتاۋ (الاشانكۋ) تەمىر جول تورابى مەن ءترانسسىبىر ماگيسترالىنا باسەكەلەس بولادى.

“The Qazaq Times”