فوتو: aljazeera.com

مالديۆ ارالدارىنىڭ پارلامەنتى ەلدىڭ توتەنشە جاعداي ستاتۋسىن 30 كۇنگە سوزدى، - دەپ حابارلايدى Al Jazeera اقپارات اگەنتتىگى. 

ەل استاناسى مالە قالاسىندا بولىپ جاتقان نارازىلىق شەرۋلەرى مەن 5 قاڭتار كۇنى ابدۋللا يامەن (Abdulla Yameen) جاريالاعان 15 كۇندىك توتەنشە جاعدايدىڭ حالىقارالىق سىنعا ۇشىراۋى فونىندا وسىنداي شەشىم قابىلداندى.

جوعارعى سوت 9 وپپوزيتسيونەرگە تاعىلعان ايىپتى الىپ تاستاپ، ولاردى بوساتۋ تۋرالى شەشىم شىعارعاننان كەيىن يامەن "ۇلتتىق قاۋىپسىزدىكتى" قامتاماسىز ەتۋ ماقساتىندا ەلدە توتەنشە جاعداي مەرزىمىن سوزعان كورىنەدى. ول جوعارعى سوت عيماراتىنا اسكەر جىبەرىپ، ەلدىڭ باس 2 سوتىن تۇتقىنداعان. ونىڭ باۋىرى، بۇرىنعى پرەزيدەنت مومۋن ابدۋل گايوم (Maumoon Abdul Gayoom) دا وپپوزيتسيا جاعىندا بولعانى ءۇشىن تۇتقىندالدى.

جوعارعى سوتتىڭ قالعان ءۇش سوتى يامەن قارسىلاستارىن بوساتۋ تۋرالى شەشىمدەرىن وزگەرتتى. سونىمەن قاتار وپپوزيتسياعا جاقتاسقان 12 پارلامەنت مۇشەسىنە لاۋازىمدارىن قايتارۋ تۋرالى ۇكىم دە وزگەرتىلدى.

ەلدەگى داعدارىس وپپوزيتسيونەرلەردىڭ جاپپاي ەرەۋىلگە شىعۋىنا يتەرمەلەدى. نارازىلىق بىلدىرۋشىلەر مەن پوليتسيا اراسىنداعى قاقتىعىس كۇننەن كۇنگە ءورشىپ بارادى. جۇما كۇنگى شەرۋ كەزىندە ەكى جۋرناليسكە ومون كۇش كورسەتكەن كورىنەدى.

سەيسەنبى كۇنى 15 كۇندىك مەرزىم اياقتالىپ، توتەنشە جاعداي ۋاقىتىن سوزۋ تۋرالى ۇسىنىسقا داۋىس بەرۋ كەزىندە وپپوزيتسيونەرلەر قارسى بولعان. بىراق بيلىك باسىنداعى پارتيانىڭ 38 مۇشەسى "قولدايمىن" دەپ جاۋاپ بەردى. وپپوزيتسيونەرلەردىڭ ايتۋىنشا، توتەنشە جاعداي مەرزىمىن سوزۋ "زاڭسىز، ءارى ءتيىمسىز". سەبەبى ەل كونستيتۋتسياسى بويىنشا، داۋىس بەرۋ كەزىندە پالاتانىڭ 85 مۇشەسىنىڭ كەمىندە 43-ءى مىندەتتى تۇردە بولۋ كەرەك.

وپپوزيتسيالىق توپ كوشباسشىسى يبراگيم موحامەد سوليح (Ibrahim Mohamed Solih): "پرەزيدەنت يامەن قاجەتتى داۋىستى جيناي الماعاندىقتان، راتيفيكاتسيا جاساپ الىپ، توتەنشە جاعداي مەرزىمىن ۇزارتتى. باسقاشا ايتقاندا، ول بۇكىل ەلدى جاۋلاپ الىپ، ديكتاتور سياقتى باسقارادى", - دەدى.

بۇۇ-نىڭ ادام قۇقىقتارى جونىندەگى باسقارما باسشىسى وسى ايدىڭ باسىندا ەلدەگى توتەنشە جاعدايدى "دەموكراتياعا قارسى شابۋىل" دەپ باعالاعان.

“The Qazaq Times”