ۋكراينا رەسمي مينسكىنىڭ بۇۇ-نىڭ دونباستاعى بەيبىتشىلىكتى قولداۋ ميسسياسىنا قاتىسۋىنا قارسى – دەپ حابارلايدى كوررەسپوندەنت گازەتى.

باسىلىم مالىمەتىنشە، ۋكراينا سىرتقى ىستەر ءمينيسترى ەلەنا زەركال بۇۇ-نىڭ دونباستاعى بەيبىتشىلىكتى قولداۋعا بايلانىستى وتەتىن وتىرىسىنا قاتىستى «5 كانال» تەلەارناسىنا سۇحبات بەرگەن. وندا ول: «مەنىڭ بىلۋىمشە، بەلارۋس ۇقشۇ (ودكب) قۇرامىنان شىققان جوق، ءالى دە سونىڭ مۇشەسى. ەگەر ءبىز ناتو-نى بەيبىتشىلىكتى قولداۋ ميسسياسىنىڭ وتىرىسىنا قاتىستىرمايتىن بولساق، وندا بەلارۋستى دا شەتتەتكەن دۇرىس شىعار. قازىرگى تاڭدا ەڭ باستى ماسەلە بىتىمگەر اسكەردىڭ ۋكراينا مەن رەسەي اراسىنداعى شەكاراعا ورنالاسۋى. بۇل جونىندە ۇزاق ۋاقىتتان بەرى پىكىرتالاس ءجۇرىپ كەلەدى» - دەگەن.

ەستەرىڭىزگە سالايىق، قازاقستان پرەزيدەنتى نۇرسۇلتان نازارباەۆ قاڭتار ايىندا اقش-قا جاساعان رەسمي ءىس-ساپارى كەزىندە: «ۋكراينا داعدارىسىنا بايلانىستى مينسك كەلىسسوزدەرى تىعىرىققا تىرەلدى» - دەپ مالىمدەپ، مينسك كەلىسسوزدەرىن بەلارۋستان استاناعا اۋىستىرۋدى ۇسىنعان بولاتىن. كەيىننەن بەلارۋس سىرتقى ىستەر ءمينيسترى ۆلاديمير ماكەي: «ۋكرايناداعى جاعدايلاردى رەتتەۋگە بايلانىستى كەلىسسوزدەردى مينسكىدەن استاناعا اۋىستىرۋ ماسەلەنى شەشپەيدى. ءبىز وزگەلەرمەن سالىستىرعاندا بىتىمگەرلەر لاۆرىنىڭ ارتىنان جۇگىرىپ جۇرگەن جوقپىز» - دەپ مالىمدەگەن.

“The Qazaq Times”